Улады маюць намер ліквідаваць Мінскае роварнае таварыства
27 ліпеня, Позірк. Мінскі гарадскі суд 6 жніўня разгледзіць іск аб ліквідацыі грамадскага аб’яднання “Мінскае роварнае таварыства” (МРТ), вынікае з раскладу на партале электроннага судаводства.
Суддзя Алена Шэмет пачне працэс, ініцыяваны галоўным упраўленнем юстыцыі Мінгарвыканкама, у 14:00.
Мінскае роварнае таварыства — вядомае аб’яднанне, якое займаецца развіццём і папулярызацыяй роварнага руху ў якасці турызму і ровара як гарадскога транспарту.
Паводле звестак з Адзінага дзяржрэгістра юрыдычных асоб і індывідуальных прадпрымальнікаў, арганізацыя зарэгістраваная 16 сакавіка 2011 года.
22 сакавіка 2023 года праўленне таварыства заявіла сталічным уладам пра намер працягваць дзейнасць. З пададзенай у гарвыканкам справаздачы вынікае, што на той момант членамі МРТ з’яўляўся 671 чалавек.
Сярод іншага таварыства паведаміла, што на працягу года яго члены выпрацоўвалі прапановы “па стварэнні норм па ўсталёўцы роварных стаянак”, вялі маніторынг “тэхнічных норм у распрацоўцы”, уносілі прапановы “датычна роварнай інфраструктуры падчас грамадскіх абмеркаванняў”.
Адметна, што за два тыдні да падачы гэтага дакумента, 9 сакавіка, намеснік дырэктара МРТ Максім Пучынскі быў прыгавораны да 2,5 года абмежавання волі без накіравання ў папраўчую ўстанову адкрытага тыпу паводле ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Пакуль ён быў у няволі, праваабаронцы лічылі яго палітвязнем.
Пасля вынясення выраку мужчыну вызвалілі з-пад варты, праз некалькі дзён ён пакінуў Беларусь.