У Мінску амаль на траціну вырасла колькасць цяжкіх і асабліва цяжкіх злачынстваў — у іх ліку згвалтаванні і “экстрэмізм”

31 ліпеня, Позірк. У Мінску ў першым паўгоддзі 2024 года зафіксавана зніжэнне колькасці злачынстваў на 10,7%, паведаміў пракурор сталіцы Алег Лаўрухін на пасяджэнні калегіі пракуратуры горада.

“Не дапушчана росту забойстваў, наўмысных прычыненняў цяжкіх цялесных пашкоджанняў, крадзяжоў, а таксама колькасці загінуўшых, у тым ліку дзяцей, ад пажараў, утапленняў, дарожна-транспартных здарэнняў. Зменшылася доля злачынстваў, учыненых у стане алкагольнага ап’янення, групай асоб”, — цытуе яго прэс-служба пракуратуры сталіцы.

Лаўрухін “звярнуў увагу на рост колькасці асабліва цяжкіх і цяжкіх злачынстваў (+27,2%), які адбыўся ў асноўным у сувязі з частымі выпадкамі згвалтаванняў і гвалтоўных дзеянняў сексуальнага характару, разбояў, махлярстваў, ухіленняў ад выплаты падаткаў, збораў, стварэння экстрэмісцкіх фарміраванняў альбо ўдзелу ў іх, фінансавання і садзейнічання экстрэмісцкай дзейнасці”.

Адзначаны рост выяўленых карупцыйных злачынстваў, парушэнняў антыкарупцыйнага заканадаўства: узбуджана 10 крымінальных спраў. Больш за ўдвая павялічылася колькасць працэдур закупак, адмененых па патрабаваннях пракурораў, гаворыцца ў рэлізе.

“Павышаная ўвага” ўдзелена стану падлеткавай злачыннасці, якая павялічылася на 36,8%, больш як у тры разы вырасла колькасць злачынстваў непаўналетніх, звязаных з незаконным абаротам наркатычных сродкаў з мэтай збыту.

Пры гэтым “процідзеянне экстрэмізму” Лаўрухін пералічыў сярод прыярытэтаў працы.

Пасля масавых пратэстаў 2020 года ўлады трактуюць як экстрэмізм дэ-факта любую не лаяльную ім грамадскую і палітычную актыўнасць, дзейнасць незалежных СМІ. Распаўсюджванне “экстрэмісцкіх матэрыялаў” пераследуецца ў адміністрацыйным парадку, узаемадзеянне з “экстрэмісцкімі фарміраваннямі” — у крымінальным.