На мяжы з Латвіяй знойдзены чарговы труп замежніка — Дзяржпамежкамітэт

31 ліпеня, Позірк. Чарговы труп замежніка знойдзены 31 ліпеня на мяжы з Латвіяй, заяўляе прэс-служба Дзяржаўнага памежнага камітэта.

Паведамляецца, што памежнікі знайшлі ў Верхнядзвінскім раёне (Віцебская вобласць) непадалёк ад мяжы двух чалавек, адзін з іх быў мёртвы, другі — жывы, але збіты. Апошні, як сцвярджаецца, назваўся грамадзянінам Індыі і паведаміў, што напярэдадні іх дваіх затрымалі латвійскія сілавікі, “жорстка збілі, а затым выштурхнулі праз брамку для жывёл на беларускую тэрыторыю”.

Памежнікі выклікалі медыкаў. Урачы канстатавалі смерць аднаго мужчыны, аказалі дапамогу другому, які пасля быў дастаўлены ў Верхнядзвінскую цэнтральную раённую бальніцу.

“З пачатку года карная міграцыйная палітыка Еўрасаюза на мяжы з Беларуссю забіла ўжо трынаццаць бежанцаў: дзевяць смерцяў зафіксаваныя на мяжы з Латвіяй і чатыры — на мяжы з Польшчай”, — заяўляе Дзяржпагранкамітэт.

Папярэдні раз ведамства паведамляла пра выяўленне цела мігранта на мяжы з Латвіяй 26 чэрвеня.

Ад пачатку ліпеня суседнія краіны Еўрасаюза спынілі мінімум 2.414 спробаў мігрантаў нелегальна трапіць з боку Беларусі (Польшча — не менш за 1.271, Латвія — 1.030, Літва — 113). Гэта на 43% менш, чым за 30 дзён чэрвеня 2024 года (4.236), і на 49,6% менш, чым за аналагічны перыяд ліпеня 2023-га (4.792). Зніжэнне дынамікі можа быць звязана са стварэннем Польшчай буфернай зоны на мяжы з Беларуссю, якая дзейнічае з 13 чэрвеня.

У Латвіі колькасць спробаў за месяц павялічылася ў 2,4 раза (з 427 за 30 дзён чэрвеня да 1.030 за 30 дзён ліпеня). У параўнанні з 1–30 ліпеня 2023 года, калі было зафіксавана 856 спробаў, рост склаў 20,3%.

30 ліпеня ў Латвіі быў паўтораны сутачны рэкорд па колькасці спробаў пранікнення мігрантаў з Беларусі. Дзяржаўная памежная ахова гэтай балтыйскай дзяржавы прадухіліла 81 такую спробу. Столькі ж было 18 ліпеня (папярэдняе рэкорднае значэнне было 21 траўня — 76).

Міграцыйны крызіс на мяжы Беларусі і Еўрасаюза цягнецца з вясны 2021 года. Улады Польшчы і краін Балтыі называюць яго “гібрыднай атакай”, арганізаванай рэжымамі ў Мінску і Маскве.