ДПК паведаміў пра гібель мігранта на мяжы з Латвіяй

26 чэрвеня, Позірк. На мяжы з Латвіяй у Полацкім раёне (Віцебская вобласць) 25 чэрвеня знойдзенае цела мігранта, паведамляе прэс-служба Дзяржаўнага памежнага камітэта (ДПК).

Адзначаецца, што цела “без прыкмет жыцця” знаходзілася “за 20 метраў ад памежнага плоту”.

У мігранта пры сабе былі пашпарт і пасведчанне кіроўцы на імя 44-гадовага грамадзяніна Індыі, гаворыцца ў паведамленні.

Паводле сцвярджэння ДПК, “з пачатку месяца польскія і латвійскія вайскоўцы тройчы дэманстравалі на практыцы жорсткую палітыку Еўрасаюза ў дачыненні да “няправільных бежанцаў”, сярод якіх былі нават жанчыны”.

Ведамства заяўляе, што “сілавікі сумежных краін іх збівалі, расстрэльвалі гумовымі кулямі, ужывалі электрашокеры і пярцовы газ, а затым выкідалі змардаваных замежнікаў на тэрыторыю Беларусі, аднак ва ўсіх трох выпадках беларускаму боку ўдавалася выратаваць кожнага з бежанцаў”.

10 траўня ДПК паведаміў аб выяўленні каля латвійскага памежнага плота ў Браслаўскім раёне (Віцебская вобласць) целаў “двух мужчын без прыкмет жыцця”, заявіўшы, што прычынай іх смерці сталі “дзеянні латвійскіх сілавікоў”.

З пачатку чэрвеня памежныя з Беларуссю краіны ЕС спынілі не менш за 3.829 спробаў парушэння мяжы з беларускай тэрыторыі (Польшча — не менш за 3.424, Латвія — 373, Літва — 32). Гэта на 40,6% менш, чым за 25 дзён траўня гэтага года (6.449), і на 26,1% больш, чым за 25 дзён чэрвеня мінулага года (3.036).

У 2024 годзе суседнія краіны ЕС спынілі не менш за 22.642 спробы пранікнення на сваю тэрыторыю з Беларусі (Польшча — не менш за 19 882, Латвія — 2 511, Літва — 249) — на 21,9% больш, чым за аналагічны леташні перыяд (18 573). На польскім кірунку колькасць спробаў павялічылася на 51,6% (было 13.114), на латвійскім — зменшылася ў 1,7 раза (4.190), на літоўскім — зменшылася ў 4,9 раза (1.232).

Міграцыйны крызіс на мяжы Беларусі і краін ЕС пачаўся ўвесну 2021 года. Спачатку шматразовае павелічэнне колькасці нелегальных мігрантаў адчула Літва. Пасля таго як Вільнюс прыняў рашэнне не затрымліваць мігрантаў, а вяртаць у Беларусь, патокі нелегалаў пераарыентаваліся на Польшчу, а затым на Латвію.

Кіраўніцтва дзяржаў Балтыі і Польшчы ўсклала адказнасць за міграцыйны крызіс на мяжы на беларускія ўлады, тыя ў адказ назвалі прычынай крызісу дзеянні Захаду ў краінах, адкуль прыбываюць мігранты.

Маюцца шматлікія сведчанні аб удзеле супрацоўнікаў беларускіх сілавых ведамстваў у перамяшчэнні нелегалаў праз мяжу з ЕС.

У лістападзе 2021 года ў інтэрв’ю BBC Аляксандр Лукашэнка “цалкам дапусціў”, што сілавікі дапамагаюць мігрантам незаконна перасякаць мяжу.

“Нашы дапамагаюць ім перабрацца на польскую тэрыторыю, так? Слухайце, цалкам магчыма. Магчыма, хтосьці і дапамог, і я нават не буду разбірацца. Я і сказаў, я не буду іх затрымліваць на мяжы, трымаць іх на мяжы. Паўтараю: і надалей не буду іх трымаць на мяжы, калі яны будуць ісці праз Беларусь. Таму што яны ідуць не да мяне, а да вас. Вы перасталі выходзіць на кантакт і працаваць. Не хочаце — не трэба. Мы без вас будзем вырашаць гэтую праблему. Так, як атрымаецца. Але я іх сюды не запрашаў”, — сказаў Лукашэнка.

Паводле ацэнак шэрагу экспертаў, міграцыйны крызіс быў інспіраваны Мінскам (некаторыя лічаць, сумесна з Масквой) з мэтай помсты Захаду за ацэнку палітычных падзей 2020 года ў Беларусі і ўвядзенне санкцый, а таксама для прымусу еўрапейскіх палітыкаў да дыялогу з рэжымам Лукашэнкі.

Праз міграцыйны крызіс Польшча, Літва і Латвія пабудавалі на мяжы з Беларуссю загароды.