Андрэй Лучанок вызвалены ад пасады амбасадара ў ААЭ

5 жніўня, Позірк. Андрэй Лучанок вызвалены ад пасады амбасадара Беларусі ў Аб’яднаных Арабскіх Эміратах (ААЭ) і па сумяшчальніцтве ў Кувейце, Бахрэйне і Саудаўскай Аравіі, паведаміў 5 жніўня неафіцыйны канал прэс-службы Аляксандра Лукашэнкі “Пул першага” са спасылкай на яго ўказ.

Дыпламат быў прызначаны на пасаду 28 сакавіка 2019 года, прыступіў да выканання абавязкаў у красавіку таго ж года.

Лукашэнка наведваў ААЭ з дзяржаўнымі візітамі ў 2000 і 2007 гадах, з працоўнымі — у 2013, 2014, 2016, 2017, 2019 і 2023 (двойчы) гадах.

Сёлета ў чэрвені юрыдычная каманда офіса беларускага дэмакратычнага лідара Святланы Ціханоўскай заклікала беларусаў адмовіцца ад паездак у ААЭ, паколькі наведванне гэтай краіны можа быць небяспечным у сувязі з падпісаннем двухбаковага міжурадавага пагаднення аб “супрацоўніцтве ў галіне бяспекі і супрацьдзеяння тэрарызму”.

Дыпламатычныя адносіны паміж краінамі былі ўстаноўленыя 20 кастрычніка 1992 года. Амбасада Беларусі ў Абу-Дабі пачало працаваць у снежні 1999 года, Аб’яднаных Арабскіх Эміратаў у Мінску — у кастрычніку 2008-га.

Краіны актыўна супрацоўнічаюць па лініі сілавых ведамстваў, а таксама ў інвэстыцыйнай сфэры.