У Баранавіцкім раёне мужчына загінуў падчас расчысткі лесу ад паваленых дрэў

6 жніўня, Позірк. 49-гадовага мужчыну насмерць прыціснула дрэвам у Баранавіцкім раёне (Брэсцкая вобласць), паведамляе прэс-служба Следчага камітэта.

Папярэдне ўстаноўлена, што раніцай 6 жніўня работнікі Баранавіцкай дыстанцыі ахоўных лесанасаджэнняў расчышчалі ўчастак лесу ад паваленых дрэў паблізу станцыі Грыцавец.

Спілаванае дрэва ўпала на галаву мужчыны, ён сканаў на месцы. Прызначана судова-медыцынская экспертыза.

Паводле звестак МНС, ад непагадзі ў ліпені ў краіне загінула сем чалавек, у тым ліку двое дзяцей. Зафіксавана 830 выпадкаў падзення дрэў у Брэсцкай (23), Гомельскай (404), Мінскай (8) і Магілёўскай (384) абласцях і Мінску (11). Паваленымі дрэвамі пашкоджана 55 аўтамабіляў у Гомельскай (46), Мінскай (1) і Магілёўскай (8) абласцях.

Паводле прагнозу Белгідрамета, да канца дня 6 жніўня захаваюцца неспрыяльныя ўмовы надвор’я. Аб’яўлены аранжавы ўзровень небяспекі. Месцамі навальніцы і залевы з узмацненнем ветра да 15–20 м/с.