Супраць краін СНД вядзецца “перманентная гібрыдная вайна”, сцвярджае Лукашэнка

8 жніўня, Позірк. Краіны Садружнасці Незалежных Дзяржаў “спрабуюць пасварыць і раскалоць знутры”, яны знаходзяцца “пад прэсам незаконных аднабаковых эканамічных санкцый”, супраць іх народаў “вядзецца перманентная гібрыдная вайна”, заявіў Аляксандр Лукашэнка 8 жніўня на сустрэчы з удзельнікамі пасяджэння Савета міністраў унутраных спраў СНД.

“Кожная з краін СНД ужо перажыла хаця б адну “каляровую рэвалюцыю”, якая ў сваёй сутнасці з’яўляецца спробай дзяржаўнага перавароту”, — цытуе Лукашэнку яго прэс-служба.

Адной з найважнейшых задач праваахоўных органаў краін СНД, на яго думку, з’яўляецца процідзеянне тэрарызму; эфектыўная барацьба “з гэтым злом” патрабуе “комплекснага падыходу, які ўключае палітычныя, сацыяльныя і эканамічныя меры, развіццё міжнароднага супрацоўніцтва і абмен інфармацыяй”.

“Толькі разам мы зможам гэтаму супрацьстаяць”, — сказаў Лукашэнка.

Старшыня каардынацыйнай службы Савета камандуючых памежнымі войскамі дзяржаў СНД Аляксандр Манілаў па выніках сустрэчы кіраўнікоў памежных ведамстваў васьмі краін Садружнасці 21 чэрвеня ў Мінску заяўляў, што абстаноўка на знешніх рубяжах аб’яднання “складаная, напружаная”, “па знешнім перыметры сканцэнтраваныя сілы і сродкі, якія спрабуюць расхістаць Садружнасць звонку”.

На сустрэчы абмяркоўвалася пытанне “абстаноўкі на заходнім кірунку, цэнтральна-азіяцкім напрамку, была дадзена ацэнка дзейнасці спецыяльных службаў, а таксама дзейнасці памежных ведамстваў па ўмацаванні памежнай бяспекі”.

“Каляровымі рэвалюцыямі” Лукашэнка і прадстаўнікі яго рэжыму называюць усе спробы беларускага народа масава выказаць незадаволенасць палітыкай, якая праводзіцца ў краіне, нязменнасцю ўлады.