Пазьняк на мітынгу ў падтрымку “Белсата” заявіў аб пагрозе фактычнай ліквідацыі канала

9 жніўня, Позірк. Запланаваная рэформа іншамоўнага вяшчання ў Польшчы прывядзе да таго, што незалежнае беларускае тэлебачанне, якое глядзелі ў многіх краінах свету, будзе практычна ліквідаванае. Такую думку выказаў падчас мітынгу-пікету ў падтрымку канала “Белсат”, які прайшоў 8 жніўня ў Варшаве насупраць канцылярыі прэм’ер-міністра Польшчы, кіраўнік руху “Вольная Беларусь” Зянон Пазьняк. Арганізатарам мітынгу была таксама моладзевая патрыятычная арганізацыя “Рух”.

Як заявіў Пазьняк, “Белсат” у сённяшнім выглядзе “прыстасаваны для работы на Беларусь”. У прыватнасці, там “зроблены вельмі магутны firewall, у выніку чаго яму не страшныя ніякія DDoS-атакі”. Польскае ж тэлебачанне, на думку палітыка, знаходзіцца “на ніжэйшым узроўні электроннага забеспячэння, і для Польшчы гэта нармальна, бо гэта — дэмакратычная краіна, дзе няма такіх праблем, як у Беларусі”.

Паводле слоў Пазьняка, нягледзячы на тое, што ў руху “Вольная Беларусь” не заўсёды задаволеныя рэдакцыйнай палітыкай “Белсата”, там “зыходзяць з нацыянальных інтарэсаў і падтрымліваюць вольны друк, вольнае тэлебачанне і дэмакратыю”.

Ён адзначыў таксама “магутную асветніцкую працу”, якую праводзіць “Белсат” праз свае праграмы пра гісторыю і культуру Беларусі.

Як зазначыў прамоўца, матывы польскага боку ў справе рэфармавання “Белсата” яму незразумелыя, бо праца канала вядзецца ў тым ліку і “ў інтарэсах Польшчы”, для якой “вельмі важна, каб Беларусь была дэмакратычнай і была добрым суседам”.

Пазьняк звярнуўся да польскага боку з просьбай перагледзець планы стварэння Цэнтра замежных праграм, часткай якога павінен стаць “Белсат”, захаваўшы беларускую кампанію ў цяперашнім выглядзе.

Да ўдзельнікаў мітынгу звярнуліся таксама былая супрацоўніца “Белсата”, цяпер прадстаўніца Аб’яднанага пераходнага кабінета па нацыянальным адраджэнні, Аліна Коўшык, былая гендырэктар “Белсата” Агнешка Рамашэўска-Гузы, лідар Руху салідарнасці “Разам” Вячаслаў Сіўчык, прадстаўнікі іншых беларускіх грамадскіх арганізацый у Варшаве.

З ініцыятывы Пазьняка была прынятая рэзалюцыя з патрабаваннем захаваць “Белсат” у цяперашнім выглядзе, якую плануецца накіраваць кіраўніцтву Польшчы.

На мітынгу таксама выступіў дырэктар і галоўны рэдактар ​​тэлекампаніі TVP World Міхал Бранятоўскі, запланаваны дырэктар Цэнтра замежных праграм (ЦЗП), які будзе аб’ядноўваць усе польскія каналы, што вяшчаюць на замежных мовах, уключаючы “Белсат”. Пасля заканчэння мерапрыемства ён даў эксклюзіўны каментар “Позірку”.

Падчас мітынгу ён заявіў, што ў выніку рэформы “Белсат” не страціць самастойнасці, а яго супрацоўнікі працягнуць працу.

Пра тое, што “Белсат” плануюць уключыць у склад новай польскай медыяструктуры — Цэнтра замежных праграм (ЦЗП), стала вядома 4 ліпеня. Тады Бранятоўскі паведаміў, што асноўная праца па стварэнні ЦЗП ужо праведзеная, зараз распрацоўваецца яго рэгламент і структура.

Прадугледжваецца, што ў склад ЦЗП акрамя “Белсата” ўвойдуць расійскі канал “Вось Так” і “ўкраінская рэдакцыя”. Плануецца, што новая структура пачне працаваць 1 сакавіка 2025 года. Кіраваць ЦЗП будзе TVP World.