Беларусь адправіць у Кенію гуманітарны груз — медыкаменты і харч на 204 тыс. долараў

10 жніўня, Позірк. Беларусь адправіць у Кенію гуманітарны груз на суму больш як 638 тыс. рублёў (больш за 204 тыс. долараў), вынікае з пастановы Савета міністраў № 582 ад 8 жніўня.

Згодна з дакументам, апублікаваным 10 жніўня на Нацыянальным прававым інтэрнэт-партале, Мінск перадасць Найробі 44,8 тыс. упаковак дэсертаў і пюрэ для дзіцячага харчавання, а таксама 9,6 тыс. бляшчанак кансерваванага мяса.

Акрамя харчу ў склад гуманітарнага грузу ўвойдуць медыкаменты — вітаміны, антысептыкі, супрацьзапаленчыя, антыгельмінтавыя, протівоаллергіческіе, абязбольвальныя сродкі ды інш.

У сярэдзіне красавіка праз моцныя дажджы ва Усходняй Афрыцы пачаліся паводкі, якія прывялі да чалавечых ахвяр і маштабных разбурэнняў у Кеніі, Танзаніі і Самалі.

У Кеніі больш за ўсё пацярпела сталіца і яе наваколлі. Загінула не менш як 300 чалавек, паранена — каля 200, прапала без вестак — 75. Каля 300 тыс. жыхароў было вымушана перасяліцца. Краіна дагэтуль змагаецца з наступствамі бедства.