Праваабаронцы дамагаюцца вынятку з КК артыкула аб “непадпарадкаванні патрабаванням адміністрацыі папраўчай установы”

10 жніўня, Позірк. Праваабарончы цэнтр “Вясна” пры пасрэдніцтве спецыяльнага дакладчыка ААН па сітуацыі з правамі чалавека ў Беларусі Анаіс Марэн дабіваецца вынятку з Крымінальнага кодэкса Беларусі арт. 411 (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі).

“Зварот юрыстаў ПЦ “Вясна” да спецыяльнага дакладчыка па пытанні аб становішчы ў галіне правоў чалавека ў Беларусі ўжо зарэгістраваны. Далей спецдакладчык можа накіраваць зварот да беларускага ўрада з просьбай патлумачыць сітуацыю з арт. 411 КК”, — гаворыцца ў паведамленні на праваабарончым сайце spring96 .org.

“Вясна” лічыць, што прыцягненне да адказнасці паводле гэтага артыкула “парушае права чалавека на асабістую свабоду і права не быць судзімым або пакараным двойчы”.

Гэты артыкул, перакананыя праваабаронцы, супярэчыць п. 7 арт. 14 Міжнароднага пакта аб грамадзянскіх і палітычных правах (ратыфікаваны Беларуссю), які абвяшчае: “Ніхто не павінен быць другасна судзімы або пакараны за злачынства, за якое ён ужо быў канчаткова асуджаны або апраўданы ў адпаведнасці з законам і крымінальна-працэсуальным правам кожнай краіны”.

Пакаранні паводле гэтага артыкула, падкрэслівае “Вясна”, “накладаюцца судом на падставе рашэнняў, прынятых у турмах і папраўчых калоніях супрацоўнікамі органаў унутраных спраў”, што правакуе практыку “адвольнага і часта неадпаведнага судовага пераследу ў адносінах да цяжкасці правапарушэння”.

Юрысты таксама канстатуюць, што згаданы артыкул часта выкарыстоўваецца для “ўзмацнення ціску на палітвязняў”.

9 жніўня “Вясна” апублікавала даныя маніторынгу, згодна з якімі не менш як 55 палітзняволеных ужо асуджаныя паводле арт. 411 КК і пераведзеныя на турэмны рэжым, яшчэ 28 выстаўленыя абвінавачанні паводле гэтага артыкула.