Генеральны сакратар ПАCЕ: Народ Беларусі — гэта не рэжым

12 студзеня, Позірк. Нягледзячы на тое, што дзеянні Аляксандра Лукашэнкі вымусілі Парламенцкую асамблею Савета Еўропы (ПАСЕ) прыпыніць стасункі з Мінскам, варта разумець, што “народ Беларусі — гэта не рэжым”, заявіла генеральны сакратар ПАСЕ Дэспіна Хацівасіліу-Цовіліс на канферэнцыі “Хельсінкскі дыялог: дэмакратычная будучыня для Беларусі” у фінскай сталіцы, паведамляецца на сайце Савета Еўропы.

Паводле слоў Хацівасіліу-Цовіліс, рэзалюцыі, прынятыя раней Асамблеяй, “сведчаць аб салідарнасці і гатоўнасці краін Савета Еўропы дапамагчы беларусам, якія імкнуцца да свабоды, справядлівасці і годнасці”.

Міністр замежных спраў Фінляндыі Эліна Валтанен аддала належнае “мужнасці тых, хто працуе на карысць дэмакратычнай Беларусі” і заявіла аб падтрымцы Фінляндыяй беларускага народа. Яна “рашуча асудзіла беларускія ўлады за працяг рэпрэсіі і ўдзел у агрэсіі Расіі супраць Украіны” і “высока ацаніла актыўную ролю Савета Еўропы ў падтрымцы дэмакратычных перамен у краіне”.

“Тое, што адбываецца ў Беларусі, важнае для Фінляндыі і ЕС — і для ўсёй сусветнай супольнасці. Беларускі народ ясна прадэманстраваў сваю волю і мае права самастойна вызначаць сваю будучыню”, — адзначыла Валтанен.

“Мы хацелі б стварыць умовы, пры якіх Беларусь магла б стаць членам Савета Еўропы”, — заявіў кіраўнік фінскай дэлегацыі ў ПАСЕ, першы намеснік кіраўніка камітэта па палітычных пытаннях ПАСЕ, дакладчык па пытанню “Дэмакратычная будучыня для Беларусі” Кіма Кільюнен у сваім уступным слове.

Выступаючы пазней на панэлі па беларускай нацыянальнай ідэнтычнасці дакладчык Асамблеі па праблемах, з якімі сутыкаюцца беларусы ў выгнанні, Поль Галь адзначыў, што “Беларусь, верагодна, адзіная краіна ў свеце, якая адмаўляе сваю ўласную нацыянальную ідэнтычнасць”.

“На шчасце, адным з важных наступстваў барацьбы за дэмакратыю пасля фальсіфікаваных выбараў 2020 года стала адраджэнне беларускай ідэнтычнасці ⟨…⟩. Падтрымліваючы развіццё беларускай нацыянальнай ідэнтычнасці, мы ўзбагачаем нашу ўласную еўрапейскую ідэнтычнасць”, — адзначыў дакладчык.

25 студзеня падчас зімовай сесіі ПАCЕ пройдуць дэбаты “Дэмакратычная будучыня Беларусі”. Тады ж Кільюнен прадставіць даклад па сітуацыі ў Беларусі, па выніках абмеркавання якога будзе прынятая рэзалюцыя. Чакаецца, што з заявай выступіць беларускі дэмакратычны лідар Святлана Ціханоўская.

У дакладзе Кільюнена адзначаецца, што пасля сфальсіфікаваных прэзідэнцкіх выбараў у 2020 годзе рэжым Аляксандра Лукашэнкі “яшчэ больш умацаваўся ў сваім абуральным грэбаванні міжнародным правам і дэмакратычнымі нормамі, пра што сведчаць жорсткія рэпрэсіі супраць іншадумцаў у Беларусі”.

У праекце рэзалюцыі, падрыхтаванай на аснове дакладу, адзначаецца, што ПАСЕ салідарная з усімі, хто пацярпеў ад злачынстваў рэжыму Лукашэнкі, і пацьвярджае сваю прыхільнасьць да падтрымкі і абароны правоў, свабодаў і бясьпекі ўсіх беларусаў.

Гл. таксама:

Ціханоўская: Мы павінны пераканацца, што тыранія ў Беларусі больш ніколі не паўторыцца

На канферэнцыі па Беларусі “Хельсінкскі дыялог” 11–12 студзеня пройдзе шэсць панэльных дыскусій