У выніку аўтааварыі ў Мінскім раёне загінуў 58-гадовы кіроўца, яго пасажырка ў бальніцы (дапоўнена)

дададзеныя абзацы 4–6

27 верасня, Позірк. У выніку аўтамабільнай аварыі, якая адбылася ранкам 27 верасня ў Мінскім раёне, загінуў чалавек, яшчэ адзін — у бальніцы, вынікае з інфармацыі ДАІ УУС Мінаблвыканкама.

Паводле папярэдняй інфармацыі ведамства, на 15-м кіламетры трасы М-3 (Мінск — Віцебск) 60-гадовы кіроўца аўтамабіля “Джып Гранд Чэрокі”, які ехаў у крайняй правай паласе ў бок Віцебска, згубіў увагу і сутыкнуўся з “Рэно Дастэр”, які рухаўся ў тым жа кірунку.

58-гадовы кіроўца “Рэно” памёр на месцы здарэння ад атрыманых траўмаў. Яго 47-гадовая пасажырка шпіталізаваная.

Відаць, што загінулы — начальнік натурнай пляцоўкі кінастудыі “Беларусьфільм” Сяргей Буйніцкі. На гэта паказвае паведамленне ў тэлеграм-канале Саюза кінематаграфістаў Беларусі: “З жалем паведамляем, сёння на трасе М3 (Мінск — Віцебск), непадалёк ад вёскі Мар’яліва, адбылося ДТЗ, якое забрала жыццё <…> Буйніцкага Сяргея Браніслававіча”.

Аб’яднанне выказала спачуванні родным і блізкім Буйніцкага, паабяцаўшы пазней паведаміць пра месца і час развітання.

Пра смерць Буйніцкага — без пазначэння прычыны — паведаміла таксама Міністэрства культуры.