25 лютага, Позірк. Каранаваць самога сябе прапанавала Святлана Ціханоўская Аляксандру Лукашэнку, рэагуючы на яго заяву аб намеры зноў ісці на прэзідэнцкія выбары ў 2025 годзе.
“Лукашэнка кажа, што зноўку будзе балатавацца ў прэзідэнты? Давай. Карануй ужо сябе. Усё роўна нікога не падманеш”, — напісала яна на сваёй англамоўнай старонцы ў “Твітары”.
25 лютага, адказваючы на пытанні прапагандыстаў на ўчастку па выбарах дэпутатаў Палаты прадстаўнікоў і ў мясцовыя саветы, 69-гадовы Лукашэнка заявіў, што пакідаць прэзідэнцкую пасаду “ў такі няпросты і нявызначаны перыяд” раўназначна здрадзе. Пры гэтым ён назваў сябе “прэзідэнтам, які сыходзіць”.
Лукашэнка дэ-факта кіруе краінай амаль 30 гадоў. Пасля прэзідэнцкіх выбараў 2020 года застаўся ва ўладзе дзякуючы сілавому падаўленню масавых акцый пратэсту і падтрымцы Расіі. Лаяльны Цэнтрвыбаркам аддаў яму 80% галасоў. Асноўны канкурэнт Ціханоўская, якая лічыць сябе пераможцай выбараў, афіцыйна атрымала 10%. Дэмакратычныя краіны лічаць яе альбо лідарам дэмакратычных сілаў, альбо абраным прэзідэнтам у выгнанні. На радзіме Ціханоўская завочна пераследуецца ў крымінальным парадку.
