Лясны пажар у Жыткавіцкім раёне лакалізаваны, тушэнне абцяжаранае асаблівасцямі мясцовасці

3 жніўня, Позірк. Лясны пажар у Жыткавіцкім раёне (Гомельская вобласць) лакалізаваны, паведаміла ўвечары 3 жніўня прэс-служба Міністэрства па надзвычайных сітуацыях.

Паводле інфармацыі ведамства, плошча пажару складае 5 гектараў. Верталёт МНС за 18 заходаў выліў на ахопленую агнём тэрыторыю 54 тоны вады.

“На месцы пажару працягваюць працаваць ратавальнікі, работнікі лясгаса. Тушэнне абцяжаранае адсутнасцю пад’язных шляхоў і забалочанасцю мясцовасці”, — гаворыцца ў паведамленні.

Жыткавіцкі раён знаходзіцца ў заходняй частцы вобласці, а таксама адносна недалёка ад мяжы з Украінай.