Рыбакоў у ААН заявіў аб пагрозе “радыкальнай эскалацыі сітуацыі” з-за ўкраінскіх БПЛА

14 жніўня, Позірк. “Надзвычай сур’ёзным інцыдэнтам, які можа прывесці да радыкальнай эскалацыі сітуацыі” і “вельмі небяспечнай спробай пашырыць зону канфлікту” назваў прадстаўнік Беларусі пры ААН Валянцін Рыбакоў гісторыю з “украінскімі БЛПА” на мерапрыемстве ў Савеце Бяспекі Арганізацыі.

Відэазапіс ягонага выступу апублікаваў тэлеграм-канал “Глас МИДа”.

“Пры гэтым уключыць у канфлікт спрабуюць Беларусь, якая нязменна выступае за ўрэгуляванне крызісу і спыненне кровапраліцця ў рэгіёне”, — адзначыў ён.

Рыбакоў згадаў брыфінг кіраўніка Мінабароны Віктара Хрэніна, які адбыўся 10 жніўня, заявіў, што ў той жа дзень Аляксандрам Лукашэнкам аддадзены загад на ўзмацненне групоўкі войскаў “на адпаведных тактычных кірунках”.

Прадстаўнік Мінска нагадаў аб выкліку ў МЗС Беларусі дыпламатаў Украіны і ЕС.

Пры гэтым Рыбакоў паўтарыў агучаныя раней ведамствам тэзісы: пра тое, што эскалацыя канфлікту “небяспечная яго сур’ёзным пашырэннем, у т.л. на краіны ЕС” і аб тым, што “Беларусь будзе ў поўнай меры выкарыстаць сваё права на самаабарону” і адказваць “на любыя правакацыі” — “з выкарыстаннем усіх наяўных сіл, сродкаў і магчымасцей”.

10 жніўня Лукашэнка абвінаваціў Украіну ў парушэнні беларускай паветранай прасторы беспілотнымі лятальнымі апаратамі і загадаў вярнуць да паўднёвай мяжы адведзеныя ў ліпені войскі. Гэта адбылося на фоне наступальнай аперацыі ўкраінскіх войскаў у Курскай вобласці РФ.

11 жніўня спікер Дзяржаўнай памежнай службы Украіны Андрэй Дземчанка ў эфіры ўкраінскіх тэлеканалаў паведаміў, што ведамства не бачыць зменаў на мяжы з Беларуссю.

13 жніўня прэс-сакратар МЗС Украіны Георгій Ціхі паведаміў, што Кіеў не бачыць “асаблівай мэтазгоднасці” рэагаваць на выказванні Лукашэнкі аб парушэнні паветранай прасторы, бо “беларускі бок вядомы шматлікімі заявамі, на якія не варта рэагаваць”.

У той жа дзень Мінск паскардзіўся на Украіну ў Савет бяспекі ААН.