Мінэканомікі: ВУП за сем месяцаў 2024 года вырас на 5,1%

14 жніўня, Позірк. “Эканоміка расце з тэмпам 5% — з перавышэннем мэтавай траекторыі і вышэй сярэднесусветных значэнняў. Пры гэтым у ліпені рост ВУП паскорыўся — да 5,1%”, — заявіў дзяржСМІ міністр эканомікі Юрый Чабатар 14 жніўня.

Паводле яго слоў, змянілася якаснае напаўненне інвестыцый. “Істотна прырастае доля ўкладанняў у машыны і абсталяванне, што спрыяе росту канкурэнтаздольнасці прадпрыемстваў, павышэнню ўзроўню прадукцыйнасці працы і ў перспектыве дазволіць нарасціць экспартныя пастаўкі на рынкі дружалюбных краін”, — цытуе Чабатара прэс-служба Мінэканомікі.

Афіцыйныя даныя аб валавым унутраным прадукце па выніках сямі месяцаў Белстат пакуль не апублікаваў.

ВУП за студзень — чэрвень 2024 года склаў 113,8 млрд рублёў — у супастаўных цэнах на 5% больш, чым за аналагічны перыяд 2023-га.

У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%.

Паводле найважнейшых прагнозных (дэ-факта планавых) параметраў развіцця краіны на 2024 год, прырост ВУП павінен скласці 3,8%.

Міжнародны валютны фонд чакае рост беларускай эканомікі на ўзроўні 2,4%, Сусветны банк — 1,2%, Еўрапейскі банк рэканструкцыі і развіцця — 2,8%, даследчы цэнтр BEROC — 4%, Еўразійскі фонд стабілізацыі і развіцця — 3,7%.

У 2023 годзе ВУП вырас на 3,9%, у 2022-м — знізіўся на 4,7%, у 2021-м эканоміка вырасла на 2,3%, у 2020-м — скарацілася на 0,9%.