СМІ: У Грузіі згвалтаваная беларуска, падазраваны затрыманы

22 жніўня, Позірк. Аб згвалтаванні ў Батумі турысткі з Беларусі паведаміў 21 жніўня грузінскі тэлеканал Mtavari.

Узбуджана крымінальная справа, падазраваны затрыманы і змешчаны пад варту.

Адзначаецца, што канфіскаваныя запісы з камер назірання, ахвяра гвалту прайшла медыцынскае абследаванне.

Інцыдэнт адбыўся ў прыморскай паркавай зоне каля двух тыдняў таму.

Падазраваным па справе з’яўляецца кіраўнік адной са службаў адміністрацыі батанічнага саду Батумі, паведамляе партал ajaratimes.ge.

25 лютага гэтага года ў Варшаве была згвалтаваная 25-гадовая беларуска Ліза Герцэн. Мужчына, пагражаючы нажом, адцягнуў яе да брамы шматкватэрнага дома, дзе згвалціў, душыў і жорстка збіў. Пасля гэтага ён пакінуў яе у несвядомым стане. Яго арыштавалі ў той жа дзень на выхадзе з дому.

1 сакавіка Герцэн памерла ў бальніцы. Яе пахавалі 14 сакавіка на Паўночных камунальных могілках у польскай сталіцы.

Трагедыя выклікала вялікі грамадскі рэзананс як у Беларусі, так і ў Польшчы. Некалькі тысяч чалавек 6 сакавіка ўзялі ўдзел у вулічнай акцыі памяці загінулай.

Першапачаткова гвалтаўнік быў абвінавачаны ў замаху на забойства, спалучанае са згвалтаваннем і разбоем, пазней абвінавачванне перакваліфікаванае на забойства на сексуальнай глебе і разбой. 9 жніўня абвінаваўчы акт па справе Дарыяна С., які абвінавачваецца ў забойстве, перададзены ў акруговы суд Варшавы.