Лукашэнка зноў прыняў у беларускае грамадзянства больш за дзвесце замежнікаў
26 жніўня, Позірк. 243 чалавекі былі прыняты ў беларускае грамадзянства Аляксандрам Лукашэнкам 26 жніўня, паведаміла ягоная прэс-служба.
Сярод іх — 23 непаўналетніх.
Паведамляецца, што гэтыя людзі прыбылі ў Беларусь на пастаяннае жыхарства больш за пяць гадоў таму і “паспяхова працуюць у сельскай гаспадарцы, будаўніцтве, транспартнай галіне, у сферы паслуг і гандлю, у галіне медыцыны і сістэме адукацыі”.
У ліку прынятых у грамадзянства — людзі, якія прыбылі з Азербайджана, Арменіі, Грузіі, Ірана, Казахстана, Лівана, Малдовы, Расіі, Туркменістана, Узбекістана, Украіны і іншых дзяржаў.
11 чэрвеня Лукашэнка даў грамадзянства 244 замежнікам, у тым ліку 24 непаўналетнія, з 18 краін.
Тады паведамлялася, што ён таксама прыняў рашэнне “аб адхіленні шэрагу заяў замежных грамадзян, якія не выканалі ўсіх умоў прыёму ў грамадзянства Рэспублікі Беларусь, устаноўленых нацыянальным заканадаўствам”. На гэты раз аб адмовах у станоўчым рашэнні не паведамляецца.
Згодна з указам ад 21 ліпеня 2023 года № 222, асобы, якія набываюць грамадзянства, павінны клясціся быць патрыётамі Беларусі, “выконваць і паважаць” Канстытуцыю і законы ў цэлым, “абараняць незалежнасць, суверэнітэт і тэрытарыяльную цэласнасць” Беларусі, “паважаць яе дзяржаўныя сімвалы, духоўныя, гістарычныя , культурныя і нацыянальныя традыцыі, захоўваць гістарычную памяць аб гераічным мінулым беларускага народа”, “паважаць годнасць, правы, свабоды і законныя інтарэсы іншых асоб”.
У згаданым дакуменце таксама вызначана “працэдура ўнясення” Лукашэнкам “матэрыялаў аб страце грамадзянства” за ўдзел у “экстрэмісцкай дзейнасці” або “нанясенне цяжкай шкоды інтарэсам Беларусі асобамі, якія знаходзяцца за межамі краіны”.
