У першай палове 2026 года банкі Беларусі выявілі 195 падробленых банкнот, у асноўным буйныя доларавыя купюры

1 кастрычніка, Позірк. У першай палове 2026 года работнікі беларускіх банкаў выявілі 235 падробленых грашовых знакаў — 195 банкнот і 40 манет, паведаміла 1 кастрычніка прэс-служба Нацыянальнага банка.

Паводле інфармацыі рэгулятара, 66% падробак выяўлена ў Мінску. Агулам фальшывыя грашовыя знакі былі вынятыя з абарачэння ў 30 населеных пунктах краіны.

“Па-ранейшаму часцей за ўсё трапляюцца фальшывыя долары ЗША — 66,8% усіх падробак. Часцей за ўсё выяўляліся фальшыўкі наміналам 100 долараў ЗША — 108 падробак, — гаворыцца ў паведамленні. — Доля падробленых еўра склала 23,8%, а іх колькасць павялічылася ў 5,6 раза. Асноўную колькасць выяўленых фальшывых еўра склалі манеты наміналам 2 еўра (28 падробак) і 1 еўра (11 падробак)”.

Адзначаецца, што за першае паўгоддзе не было выяўлена ніводнай падробленай банкноты беларускіх рублёў.

Як паведамляў “Позірк”, у 2025 годзе ў Беларусі было выяўлена 567 падробленых грашовых знакаў (561 банкнота і 6 манет) — на 28,7% менш, чым за 2024-ы (795).

Сярод выяўленых падробак больш за ўсё (87,1%) долараў ЗША — 494 адзінкі (годам раней — 661). Фальшывых расійскіх рублёў знойдзена 28 адзінак (72), еўра — 37 (54), беларускіх рублёў — 6 (7).