Кіраўнікі абаронных ведамстваў краін СНД у Туле абмяркоўваюць пытанні вайсковага і ваенна-тэхнічнага супрацоўніцтва

29 верасня, Позірк. “Комплекс пытанняў вайсковага і ваенна-тэхнічнага супрацоўніцтва” абмяркоўваецца 29 верасня ў Туле (РФ) на савеце кіраўнікоў абаронных ведамстваў краін Садружнасці Незалежных Дзяржаў.

Паводле інфармацыі прэс-службы Міністэрства абароны Расіі, бакі таксама маюць намер абмяняцца думкамі пра “існую ваенна-палітычную абстаноўку ў свеце”.

Расійскае ваеннае ведамства сцвярджае, што ў сустрэчы бяруць удзел міністры абароны васьмі краін СНД — Азербайджана, Арменіі, Беларусі, Казахстана, Кыргызстана, РФ, Таджыкістана і Узбекістана.

Разам з тым кіраўнік Мінабароны Арменіі, паводле інфармацыі мясцовых СМІ, на савет не прыбыў. Верагодна, гэта звязана з канфліктам з Азербайджанам, у выніку якога Баку ўсталяваў кантроль над непрызнанай Нагорна-Карабахскай Рэспублікай, што ўжо абвясціла пра спыненні свайго існавання з 1 студзеня 2024 года.