У Польшчы беларуса прыгаварылі да 34 месяцаў зняволення ў рамках шпіёнскай справы
27 верасня, Позірк. Акруговы суд у Любліне (Польшча) 26 верасня прыгаварыў грамадзяніна Беларусі Уладзіслава П. да 2 гадоў і 10 месяцаў пазбаўлення волі, паведаміў партал радыё RMF24.
Мужчына таксама аштрафаваны на 10 тыс. злотых (каля 2,8 тыс. долараў). Асобна з яго спагнана 8,2 тыс. злотых (каля 2,1 тыс. долараў), атрыманых у якасці “аплаты за злачынную дзейнасць”.
Грамадзянін Украіны Максім Л., які праходзіў па той жа справе, прыгавораны да 6 гадоў зняволення. Штраф і сума атрыманых сродкаў, якая падлягае спагнанню, — 15 тыс. і 20,5 тыс. злотых адпаведна (каля 3,9 тыс. і 5,4 тыс. долараў).
Асуджаныя таксама павінны выплаціць па 5.000 злотых (1,3 тыс. долараў) у Фонд дапамогі пацярпелым.
Па справе групы, абвінавачанай у шпіянажы на карысць РФ, праходзіла 16 чалавек, у тым ліку тры грамадзяніны Беларусі. 19 снежня 2023 года акруговы суд у Любліне прыгаварыў да зняволення 14 фігурантаў (беларуская грамадзянка Марыя М. атрымала найменшае пакаранне — 1 год і 1 месяц пазбаўлення волі). Справа беларуса Уладзіслава П. і ўкраінца Максіма Л. была вылучаная ў асобную вытворчасць.
Паведамлялася, што лідарам гурта быў мужчына, які “аддаваў загады праз расійскі мэсэнджар Telegram”. Гаворка ішла, у прыватнасці, пра маніторынг крытычна важнай інфраструктуры: міжнароднага аэрапорта Жэшув-Ясенка, вайскова-марскі порт у Гдыні, чыгуначную станцыю ў Жэшуве, памежныя пераходы з Украінай і ключавыя чыгуначныя шляхі, па якіх ва Украіну дастаўлялася зброя і гуманітарная дапамога. Лідар групы нібыта планаваў пусціць пад адхон цягнік з вайсковым транспартам, за што прапанаваў 10 тыс. долараў.
Паводле інфармацыі “Радыё Свабода”, сярод фігурантаў справы апрача трох беларусаў адзін расіянін, астатнія — грамадзяне Украіны.
16 сакавіка 2023 года Марыюш Каміньскі, які на той час займаў пасаду міністра ўнутраных спраў і адміністрацыі Польшчы, паведаміў, што Агенцтва ўнутранай бяспекі затрымала дзевяць замежнікаў паводле падазрэння ў супрацы з расійскімі спецслужбамі.
Паводле слоў Каміньскага, доказы паказваюць на тое, што група займалася маніторынгам чыгуначных маршрутаў. “У яе задачы ўваходзіла выяўленне, маніторынг і дакументаванне паставак зброі, якія ажыццяўляюцца для Украіны, — заявіў чыноўнік. — Падазраваныя таксама рыхтаваліся да дыверсійных дзеянняў, скіраваных на тое, каб паралізаваць пастаўкі абсталявання, зброі і дапамогі Украіне”.
Прыкладна тады ж адзін з беларускіх прапагандысцкіх тэлеграм-каналаў паведаміў, што трое затрыманых у Польшчы грамадзян Беларусі — Уладзіслаў Пасміцюха (1994 года нараджэння), Марыя Мядзведзева (2004) і Мікалай Маскаленка (1971). Там жа былі апублікаваныя відэазвароты, як сцвярджалася, сваякоў затрыманых, якія заявілі пра сфабрыкаваны характар справы.
17 чэрвеня 2024 года стала вядома, што трое з асуджаных зніклі з поля зроку ўладаў пасля выхаду з-пад папярэдняга арышту, сярод іх — Марыя Мядзведзева. Неўзабаве яе затрымалі і арыштавалі на тры месяцы.