3 кастрычніка, Позірк. У верасні на волю выйшла мінімум 94 палітвязняў, паведамляе праваабарончы цэнтр “Вясна”.
Удакладняецца, што 24 чалавекі цалкам адбылі тэрмін зняволення (сярод іх дзве жанчыны), 67 было памілавана.
Праваабаронцы адзначаюць, што амаль штотыдзень палітвязнямі прызнаюцца новыя групы грамадзян. Пры гэтым штомесяц некалькі дзясяткаў чалавек выходзяць на волю: пасля заканчэння тэрміну пакарання, пасля суда перад адпраўкай у выпраўленчую ўстанову адкрытага тыпу або перад пачаткам адбыцця пакарання без накіравання ў такую ўстанову.
Акрамя таго, гаворыцца ў паведамленні, на працягу трох месяцаў улады вызваляюць палітвязняў па памілаванні.
Звяртаецца ўвага, што, цалкам адбыўшы тэрмін зняволення, у верасні на волю выйшла Вольга Залатар, маці пецярых дзяцей, якую затрымалі 18 сакавіка 2021 года і прыгаварылі пасля да чатырох гадоў пазбаўлення волі ў калоніі.
Сярод памілаваных — актывістка руху ініцыятывы “Маці-328” Марына Кісялевіч. У траўні 2022 года яна была прыгавораная да чатырох гадоў абмежавання волі.
17 верасня па памілаванні на волю выйшаў былы журналіст Андрэй Толчын, які быў затрыманы 27 верасня 2023 года і прыгавораны да 2,5 года пазбаўлення волі.
З 3 ліпеня Аляксандр Лукашэнка памілаваў 115 чалавек.
16 верасня Лукашэнка падпісаў указ аб памілаванні 37 чалавек, асуджаных за “злачынствы экстрэмісцкай накіраванасці”, 4 верасня і 16 жніўня паводле такога ж механізму было памілавана па 30 чалавек.
У пачатку ліпеня праваабаронцы паведамлялі аб выхадзе на волю 18 палітвязняў, які адбыўся пасля заявы Лукашэнкі аб вызваленні яго “вельмі цяжкахворых” апанентаў.
Старшыня Вярхоўнага суда Валянцін Сукала паведаміў, што пасля згаданай заявы было вызвалена 14 чалавек.
У месцах несвабоды на сёння застаецца 1.285 чалавек, прызнаных палітвязнямі.
