Кіраўнік Мінкульта Маркевіч заявіў аб выкараненні ў галіне “дэструктыўных элементаў”

13 кастрычніка, Позірк. “Сучасная культура — твар краіны ў свеце, духоўная і маральная апора дзяржавы, тая сіла, якая аб’ядноўвае нас, такіх розных па поглядах, памкненнях і інтарэсах”, — заявіў міністр культуры Анатоль Маркевіч падчас урачыстага мерапрыемства, прысвечанага Дню работнікаў культуры, які адзначаецца 13 кастрычніка.

“Культура з’яўляецца той сферай, якая здольная даць годны адпор антыпатрыятычным і амаральным выклікам і пагрозам. Нас [у сферы культуры] больш за 50 тыс. Гэта цэлая армія. І сёння ўсе мы — байцы культурнага фронту, мабілізаваныя на духоўную бітву за Беларусь. Час выбраў нас. Ад міністра да загадчыка клубам і сельскай бібліятэкара залежыць поспех у барацьбе за розумы і душы суграмадзян”, — цытуюць чыноўніка дзяржСМІ.

Паводле сцвярджэння кіраўніка Мінкульта, “ачысціўшыся ад дэструктыўных элементаў”, культурная супольнасць Беларусі “засяродзіла намаганні на вырашэнні галоўнай задачы — выхаванні годных грамадзян і патрыётаў”.

“Патрыятызм — гэта не толькі памяць пра мінулае, але і прывіццё любові да краіны і гонару за яе сродкамі сучаснай культуры. У гэтых мэтах Міністэрствам культуры сумесна з нашымі калегамі ініцыяваны шэраг новых патрыятычных культурных акцый. У першую чаргу — рэспубліканскі фестываль “Беларусь — мая песня” і яго працяг — “Марафон адзінства”. Фестываль стаў велізарным люстэркам, які дазволіў убачыць усю моц і багацце беларускай культуры”, — заявіў кіраўнік Мінкульта.

Паводле яго слоў, у Беларусі “створаныя ўсе ўмовы для творчай працы”. “Як правільна выкарыстоўваць гэтыя магчымасці і дамагчыся найвышэйшых творчых вынікаў, залежыць толькі ад нас”, — сказаў Маркевіч.

29 сакавіка, выступаючы на пашыраным пасяджэнні прэзідыума Савета рэспублікі Нацыянальнага сходу, Маркевіч заклікаў улады атрымаць “маральную перамогу” над “страшнымі духоўнымі пагрозамі”.

Чыноўнік адзначыў, што ўлады “зрабілі ўрокі з падзей 2020 года”. Цяпер, паводле яго слоў, “шэрагі творчай інтэлігенцыі ачышчаюцца ад асоб, якія падрывалі асновы дзяржавы, якая іх выгадавала і карміла”.

“Духоўныя пагрозы”, паводле слоў чыноўніка, “дзейнічаюць падобна радыяцыі”: “Здаецца, незаўважна, але павольна і дакладна руйнуюць грамадства, вядуць да страт маральных арыенціраў і маральнай дэградацыі людзей”.

“Увесь гэты духоўны яд уліваўся ў свядомасць маладых людзей з дапамогай рознага роду арт-праектаў, галерэй, культурных прастор, якія фінансаваліся псеўдамецэнатамі і заходнімі фондамі. <…> Частка моладзі паддалася гэтаму тлятворнаму ўплыву і стала бяздумнай, але небяспечнай па сваёй разбуральнай сіле зброяй у руках замежных лялькаводаў”, — заявіў міністр.

Аляксандр Лукашэнка прызначыў Маркевіча міністрам культуры ў лістападзе 2020 года. Раней чыноўнік да сферы культуры дачынення не меў.

Колькасць занятых “творчай дзейнасцю і забавамі, бібліятэчнай, архіўнай, музейнай і іншай дзейнасцю ў галіне культуры” ў 2023 годзе склала 43,4 тыс. чалавек, вынікае з нядаўняга агляду Нацыянальнага статыстычнага камітэта.

У 2022 годзе іх было 43,8 тыс., 2021-м — 44,4 тыс. Такім чынам, за два гады ў Беларусі стала на тысячу работнікаў культуры менш.

Пасля масавых пратэстаў, якія сталі рэакцыяй на сфальсіфікаваныя прэзідэнцкія выбары 2020 года і гвалт з боку сілавікоў, сярод іншых пад рэпрэсіі трапіла вялікая колькасць дзеячаў культуры. Многія звольніліся ў знак пратэсту, былі вымушаныя пакінуць краіну. Адзін з найбольш паказальных прыкладаў — трупа Нацыянальнага акадэмічнага драматычнага тэатра ім. Янкі Купалы, большасць якой падтрымала прыхільнікаў пераменаў.

Паводле звестак беларускага ПЕНа, за 2023 год было зафіксавана 1.097 парушэнняў у дачыненні да 605 дзеячаў культуры.