За чацвёра сутак расійскія БПЛА тройчы заляталі ў Беларусь, у тым ліку — мінулай ноччу

20 кастрычніка, Позірк. У ноч на 20 кастрычніка Расія ў чарговы раз атакавала Украіну з дапамогай балістычных ракет і беспілотных лятальных апаратаў (БПЛА), паведамляюць Паветраныя сілы Узброеных сіл Украіны (УСУ).

Усяго на ўкраінскую тэрыторыю заляцела 49 дронаў, адзначаецца ў паведамленні.

“Па стане на 10:00 у выніку супрацьпаветранага бою пацверджана збіццё 31 варожага БПЛА ў Вінніцкай, Хмяльніцкай, Жытомірскай, Львоўскай, Адэскай, Сумскай, Палтаўскай, Чаркаскай, Кіеўскай, Мікалаеўскай, Днепрапятроўскай і Данецкай абласцях”, — заявілі ў Паветраных сілах УСУ.

Удакладняецца, што 13 расійскіх беспілотнікаў “лакальна страчаныя”, “два варожыя БПЛА паляцелі ў кірунку Беларусі”.

Маніторынгавая група “Беларускі Гаюн” паведамляе пра тры расійскія БПЛА, якія заляцелі ў Беларусь у ноч на 20 кастрычніка.

Паводле звестак групы, адзін з беспілотнікаў быў збіты сіламі беларускай СПА ў Ельскім раёне (Гомельская вобласць), які мяжуе з Украінай.

Сцвярджаецца, што гэта адбылося ў 1:25, “выбух быў чутны адразу ў некалькіх навакольных населеных пунктах”.

“Адзначым, што ў той момант у небе над Гомельшчынай знаходзіўся і знішчальнік ВПС РБ, які вылецеў з Баранавічаў каля 1:10 і да 2:30 вярнуўся на базу”, — гаворыцца ў паведамленні “Беларускага Гаюна”.

Міністэрства абароны Беларусі аб збіцці БПЛА не паведамляла.

17 і 18 кастрычніка Узброеныя сілы Украіны таксама паведамлялі пра ўварванні ў паветраную прастору Беларусі расійскіх БПЛА. У абодвух выпадках адзначалася, што на беларускую тэрыторыю прайшлі два беспілотнікі.

4 кастрычніка Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок шмат збівае незалежна ад таго, украінскія яны ці расійскія.

Залёт БПЛА Лукашэнка патлумачыў неспрактыкаванасцю тых, хто іх выкарыстоўвае, і адзначыў, што пасля ўздзеяння сродкаў радыёэлектроннай барацьбы беспілотнікі губляюць арыенцір.

“Некалькі выпадкаў такіх было і з боку Расіі, і з боку Украіны”, — сказаў ён падчас паездкі ў Пінскі раён (Берасцейская вобласць).

Паводле яго слоў, гэтыя пытанні ў Беларусі вырашаюць “на ўзроўні спецыялістаў, не выносячы ў публічнае поле”. Такія дамоўленасці нібыта былі дасягнутыя з абодвума бакамі.

У ноч на 3 кастрычніка з’явілася інфармацыя пра ўварванне чарговага расійскага беспілотніка. Тады была выказаная здагадка, што дрон іранскай маркі “Шахед” мог зваліцца ў Калінкавічах (Гомельская вобласць). Беларускія ўлады інцыдэнт ніяк не каментавалі.

Разам з тым 4 кастрычніка супрацоўнікі КДБ “пры сілавой падтрымцы вайскоўцаў САХРа” затрымалі жыхарку Калінкавічаў. Яны ўварваліся ў дом, відэакамера на якім зафіксавала шум і водбліскі беспілотніка, які падаў.

З ліпеня гэтага года рэсурсы, што спецыялізуюцца на маніторынгу вайсковай сітуацыі, паведамлялі пра мноства выпадкаў уварвання ў паветраную прастору Беларусі беспілотнікаў, якімі Расія атакуе Украіну.

У ноч на 5 верасня некалькі дронаў было збіта над Гомелем, абломкі аднаго з іх упалі на будынак склада, ніхто не пацярпеў. Мінабароны было вымушана прызнаць факт парушэння мяжы лятальнымі аб’ектамі, але не назвала, каму яны належалі.

8 верасня Міністэрства абароны Латвіі паведаміла, што ў Рэзэкненскім краі (не з’яўляецца памежным, размешчаны прыкладна за 35 км ад мяжы з Беларуссю) разбіўся расійскі дрон. 9 верасня кіраўніцтва латвійскіх Нацыянальных узброеных сіл заявіла, што расійскі дрон, што пацярпеў крушэнне ў Гайгалаўскай воласці Рэзекненскага краю, быў “начыненым выбухоўкай беспілотнікам тыпу Shahed”.