Беларускі АМАП прадэманстраваў таджыкскім сілавікам магчымасці па разгоне акцый пратэсту

22 кастрычніка, Позірк. Міністэрства ўнутраных спраў Беларусі гатова падзяліцца “перадавым вопытам па розных напрамках службовай дзейнасці”, заявіў кіраўнік ведамства Іван Кубракоў на сустрэчы ў Мінску з дэлегацыяй упраўлення МУС Таджыкістана па горадзе Душанбэ.

Як паведамляе прэс-служба МУС Беларусі, Кубракоў прапанаваў азнаёміцца таджыкскім калегам з матэрыяльна-тэхнічнай базай ведамства. “Госці агледзелі спецыяльную тэхніку, узбраенне, форменнае абмундзіраванне і экіпіроўку атрада, транспартныя сродкі розных службаў сталічнай міліцыі”, — гаворыцца ў паведамленні.

На апублікаваным прэс-службай МУС відэа паказана, як таджыкскай дэлегацыі дэманструюць магчымасці АМАПу па разгоне акцый пратэсту. Супрацоўнікі АМАПу інсцэніруюць затрыманні людзей, а таксама дзеянні ў адказ на напад меркавана ўдзельнікаў маніфестацый.

У паведамленні МУС адзначаецца, што “немалую цікавасць” у прадстаўнікоў Таджыкістана выклікалі “магчымасці беспілотных лятальных апаратаў”.

Таксама таджыкскім праваахоўнікам прадэманстравалі выставу прадпрыемстваў Дэпартамента выканання пакаранняў “з шырокім асартыментам прадукцыі”.

АМАП браў удзел у падаўленні з асаблівай жорсткасцю пратэстаў у Беларусі, а цяпер задзейнічаны ў затрыманнях па палітычных матывах. У Беларусі не распачата ніводнай крымінальнай справы аб гвалце ў дачыненні да ўдзельнікаў масавых пратэстаў, хоць са жніўня 2020 года ў Следчы камітэт было пададзена не менш за 1.800 адпаведных заяў.

Масавыя палітычныя рэпрэсіі ў Беларусі працягваюцца з 2020 года.