“Вясна”: У ліпені — верасні 2024 года зафіксаваны 1.221 выпадак рэпрэсій

24 кастрычніка, Позірк. У Беларусі з 1 ліпеня па 30 верасня зафіксаваны 1.221 выпадак палітычна матываваных рэпрэсій, з іх 360 — затрыманні, паведамляе праваабарончы цэнтр “Вясна” у аглядзе за трэці квартал 2024 года.

Па выніках красавіка — чэрвеня (другі квартал) вядома пра 1.756 выпадкаў палітычных рэпрэсій, 450 з якіх — затрыманні.

Таксама вядома мінімум пра 400 судоў па адміністрацыйных справах за апошнія тры месяцы (у другім квартале — 1.079), палова прыцягнутых да адказнасці — жанчыны. Праваабаронцы адзначаюць, што не валодаюць усімі звесткамі, таму ўсе лічбы “могуць быць значна большымі”.

Артыкулам КаАП, які найбольш выкарыстоўваецца для палітычнага пераследу, застаецца 19.11 (распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць). За тры месяцы паводле яго асудзілі не менш за 380 чалавек.

Акрамя гэтага, сілавікі актыўна ладзяць аблавы ў маленькіх гарадах: Бярозе, Глыбокім, Баранавічах, у Столінскім раёне. Не спыняюцца затрыманні і допыты пасля праверак тэлефонаў на мяжы з Беларуссю. Паводле “Вясны”, за мінулыя тры месяцы сілавікі працягвалі затрымліваць беларусаў па вяртанні з Літвы і Польшы (лічбы не прыводзяцца).

Агулам за дзевяць месяцаў 2024 года ў краіне затрымана не менш за 1.797 чалавек.

Раней праваабаронцы паведамлялі, што з 2020 года больш за 6 тыс. чалавек было асуджана з палітычных матываў. Прозвішчы гэтых людзей праваабаронцам вядомыя.

Таксама “Вясна” мае прозвішчы амаль 7,4 тыс. чалавек, на якіх былі заведзеныя палітычна матываваныя крымінальныя справы, “амаль чвэрць гэтых людзей — жанчыны”. Да пазбаўлення волі прыгаворана не менш за 2.336 чалавек, да абмежавання — мінімум 681.

За верасень з палітычных матываў было асуджана мінімум 170 чалавек (46 жанчын, 124 мужчыны).