Попыт на работнікаў і скарачэнне колькасці занятых у эканоміцы абумовілі рост заробкаў у Беларусі — ЕАБР

28 кастрычніка, Позірк. Росту заработнай платы ў Беларусі садзейнічала падвышэнне базавай стаўкі (з 1 верасня — 253 рублі, да таго з 1 студзеня — 250 рублёў), гаворыцца ў штотыднёвым аглядзе Еўразійскага банка развіцця (ЕАБР).

Аналітыкі звярнулі ўвагу на тое, што рэальная заработная плата ў верасні павялічылася на 12,5% у гадавым вымярэнні, тады як у жніўні рост складаў 12,3%.

“Важным фактарам, які ўплывае на дынаміку заработных плат, з’яўляецца сітуацыя на рынку працы, — гаворыцца ў аглядзе. — Назіраецца ўстойлівы рост вакансій (21,6% год да года ў верасні) на фоне скарачэння колькасці занятых у эканоміцы (-0,8% г/г у жніўні). Пры гэтым узровень беспрацоўя знізіўся да 2,9%, абнавіўшы гістарычны мінімум”.

Рэальны заробак паказвае, якую колькасць тавараў і паслуг работнік можа набыць за намінальны заробак.

Праведзены “Позіркам” аналіз звестак Нацыянальнага статыстычнага камітэта паказаў, што намінальная налічаная сярэдняя заработная плата работнікаў Беларусі ў верасні 2024 года склала 2.313,9 рубля — на 27,3 менш (-1,2%), чым у жніўні (2.341,2).

Аналіз даных Белстата па выніках выбарачнага абследавання дамашніх гаспадарак сведчыць, што ўзровень беспрацоўя, разлічаны ў адпаведнасці з метадалогіяй Міжнароднай арганізацыі працы (фактычнае беспрацоўе), у трэцім квартале 2024 года знізіўся на 0,5 працэнтнага пункта — да 2,9% (у тым жа квартале 2023-га гэты паказчык быў на ўзроўні 3,4%).