Набыў моц завочны прысуд Вераніцы Цапкала, Анатолю Котаву і Вользе Карач

30 кастрычніка, Позірк. Судовая калегія па крымінальных справах Вярхоўнага суда пакінула без задавальнення апеляцыі Анатоля Котава, Вадзіма Дзмітранка, Яўгена Вільскага, Вольгі Карач і Веранікі Цапкала, паведамляе Генеральная пракуратура.

Прыгавор, вынесены завочна ў ліпені Брэсцкім абласным судом, набыў моц.

“Бок абароны сцвярджаў аб незаконнасці і неабгрунтаванасці прыгавору суда першай інстанцыі. Пракурор выказаў меркаванне аб выкананні заканадаўства аб аператыўна-вышуковай дзейнасці, крымінальна-працэсуальнага закона і даказанасці віны абвінавачаных”, — гаворыцца ў рэлізе.

Фігуранты прыгавораны да 12 гадоў пазбаўлення волі паводле арт. 357 (змова або іншыя дзеянні, учыненыя з мэтай захопу дзяржаўнай улады) і арт. 361¹ (стварэнне экстрэмісцкага фарміравання або ўдзел у ім) Крымінальнага кодэкса.

Абвінавачанне лічыла іх “кіраўніком і ўдзельнікамі экстрэмісцкага фарміравання “Форум дэмакратычных сіл Беларусі”.

Котаў, Вільскі і Дзмітранок таксама прызнаныя вінаватымі па арт. 3614 (садзейнічанне экстрэмісцкай дзейнасці), Карач і Цапкала — паводле арт. 3691 (дыскрэдытацыя Беларусі) і арт. 367 (паклёп у дачыненні да прэзідэнта).

У дадатак да пазбаўлення волі суд пастанавіў спагнаць з Котава і Карач штраф — 15 тыс. базавых велічынь (600 тыс. рублёў) з кожнага, Вільскага — 12 тыс. б.в. (480 тыс. рублёў), Дзмітранка — 11 тыс. б.в. (440 тыс. рублёў), Цапкала — 1 тыс. б.в. (40 тыс. рублёў).

Першы Форум дэмакратычных сіл Беларусі прайшоў 16–17 траўня 2022 года ў Варшаве па ініцыятыве прэтэндэнта на пасаду прэзідэнта Валерыя Цапкалы (Вераніка Цапкала з’яўляецца яго жонкай), былога супрацоўніка Адміністрацыі прэзідэнта Анатоля Котава, палітолага Дзмітрыя Балкунца, іншых экспертаў і актывістаў, другі — 11–12 ліпеня таго ж года ў Берліне.

Арганізатары пазіцыянавалі форум як “публічную пляцоўку для пошуку ідэй і выпрацоўкі прапаноў па розных пытаннях грамадскага, эканамічнага і палітычнага развіцця дзяржавы”.

Па выніках другога Форума дэмакратычных сіл Беларусі было заяўлена аб намеры стварыць Нацыянальную раду Рэспублікі Беларусь.

У дакуменце ад імя часовага складу “Нацыянальнай рады аб’яднаных дэмакратычных сіл Беларусі” гаварылася аб намеры “падрыхтаваць усе неабходныя рашэнні для арганізацыі выбараў” у раду, вызначыць тэрміны іх правядзення.

Арганізатары форуму планавалі звярнуцца да ўрадаў краін — членаў ААН, АБСЕ, Савета Еўропы, Еўрапейскага парламента з просьбай “аказаць вычарпальную дапамогу ў арганізацыі выбараў у Нацыянальную раду Рэспублікі Беларусь і накіраваць міжнародных назіральнікаў”.

І на першым, і на другім мерапрыемстве гучала крытыка дзейнасці офіса дэмакратычнага лідара Святланы Ціханоўскай.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.