У Літве мясцовага жыхара ў чарговы раз затрымалі пры пераносцы кантрабандных беларускіх цыгарэт
30 красавіка, Позірк. Пра затрыманне жыхара Алітуса з дзевяццю цюкамі кантрабандных беларускіх цыгарэт паведаміла 30 красавіка Служба аховы дзяржаўнай мяжы (САДМ) Літвы.
Паводле звесак САДМ, напярэдадні супрацоўнікі памежнай заставы Кабеляй Варэнскага памежнага атрада, якія сачылі за ўчасткам мяжы з Беларуссю, “зафіксавалі, што ў лесе ля вёскі Сянове праз ахоўную агароджу з той боку перакідваюць цюкі”.
“На месца неадкладна выехаў памежны нарад з кінолагам і службовым сабакам; верагодная зона парушэння была блакаваная, — гаворыцца ў паведамленні. — Ідучы за службовым сабакам, памежнікі неўзабаве — усяго ў 150 метрах ад дзяржаўнай мяжы — дагналі мужчыну, што хутка ішоў і быў літаральна абвешаны светлымі цюкамі”.
Высветлілася, што памежнікі ўжо не раз затрымлівалі гэтага чалавека. Каля сямі гадоў таму яны выцягнулі мужчыну з твані, калі ён схаваўся з кантрабандай у балоце Чэпкяляй.
Гэтым разам пры ім было знойдзена 1.350 пачак цыгарэт NZ Gold з беларускімі акцызнымі маркамі. Кошт тытунёвай прадукцыі з улікам усіх падаткаў у Літве — 7.263 еўра.
Акрамя таго, высветлена, што жыхар Алітуса паўторна трапіў у памежную зону без дазволу САДМ ва ўмовах экстрэмальнай сітуацыі. У дачыненні да парушальніка распачата адміністрацыйная вытворчасць за паўторнае набыццё і транспартаванне падакцызных тавараў з парушэннем вызначанага парадку.
Паведамляецца, што за такое парушэнне прадугледжаны штраф — ад 5.760 да 6.000 еўра. За паўторнае парушэнне прававых актаў, якія рэгулююць памежны рэжым, “яму прызначаны штраф у памеры 170 еўра”.
“Пасля допыту памежнікі адпусцілі жыхара Алітуса, паведаміўшы дату разгляду спраў аб адміністрацыйных правапарушэннях. Вынятыя цыгарэты часова захоўваюцца на памежнай заставе Кабеляй”, — адзначыла САДМ.
23 красавіка літоўскае памежнае ведамства паведаміла пра затрыманне ў паграніччы жыхара Лаздзіяйскага раёна з кантрабанднымі беларускімі цыгарэтамі, якія таксама былі перакінутыя яму праз памежны плот.
