За невыкананне ўказа аб развіцці малочнай галіны ў Беларусі ўсталяваная персанальная адказнасць “аж да крымінальнай”
30 красавіка, Позірк. Персанальная адказнасць для службовых асоб — “аж да крымінальнай” — прадугледжаная за “неналежнае або несвоечасовае выкананне патрабаванняў” указа № 143 “Аб развіцці малочнай галіны”, які 30 красавіка падпісаў Аляксандр Лукашэнка.
У адпаведнасці з дакументам, паводле інфармацыі прэс-службы палітыка, прадугледжанае “будаўніцтва (рэканструкцыя) у 2026–2028 гадах не менш за 73 малочнатаварныя комплексы ў арганізацыях аграпрамысловага комплексу”, а таксама “стварэнне неабходнай для іх функцыянавання інфраструктуры”.
Указ вызначае “ўмовы рэалізацыі інвестыцыйных праектаў і патрабаванні, якім яны маюць адпавядаць”. Прапісаны гранічны аб’ём фінансавання аднаго інвестпраекта — 27 млн рублёў.
Арганізацыі, якія стануць рэалізоўваць гэтыя праекты, вызначыць Савет міністраў — “паводле пераліку на падставе сфармаваных аблвыканкамамі прапаноў”.
Прадугледжаная магчымасць ужыць пры будаўніцтве нормы ўказа № 46 ад 31 студзеня 2025 года “Аб асаблівасцях будаўніцтва і прыёмкі аб’ектаў у эксплуатацыю” — для “патаннення і рэалізацыі ў сціслыя тэрміны”.
Паведамляецца, што дакумент таксама вызначае крыніцы фінансавання будаўніцтва малочнатаварных комплексаў на 2026 год.
На думку прэс-службы Лукашэнкі, прыняцце ўказа “будзе садзейнічаць эфектыўнаму развіццю сельгасарганізацый”.
29 кастрычніка 2024 года Лукашэнка, выступаючы на нарадзе пра эфектыўнасць працы аграпрамысловага комплексу, фактычна звязаў “поспех” на “прэзідэнцкіх выбарах” 2025 года з будаўніцтвам малочнатаварных комплексаў.
