Сікорскі спадзяецца на вызваленне Пачобута ў “найбліжэйшай будучыні”
30 кастрычніка, Позірк. Варшава “па розных каналах” дамагаецца вызвалення суайчыннікаў, якія знаходзяцца ў беларускіх турмах, асаблівая ўвага надаецца журналісту Анджэю Пачобуту, “асуджанаму па фіктыўнай справе да васьмі гадоў калоніі”, заявіў 30 кастрычніка падчас выступу ў Сенаце міністр замежных спраў Польшчы Радаслаў Сікорскі.
Паводле яго слоў, якія перадае агенцтва РАР, роля знешнепалітычнага ведамства пры гэтым заключаецца ў “палітычнай падтрымцы”, каб палякі, “асабліва якія пражываюць у Расіі і Беларусі, мелі магчымасць захаваць сваю польскую ідэнтычнасць, нягледзячы на цяжкасці, якія ствараюцца аўтарытарнымі ўладамі гэтых краін — уключаючы запалохванні і затрыманні”.
Сікорскі падзякаваў спікеру Сенату Малгажаце Кідаве-Блоньскай за ўключэнне Пачобута ў склад Кансультатыўнай рады ў справах дыяспары пры верхняй палаце польскага парламента. “Я веру, што ў найбліжэйшай будучыні ён зможа актыўна ўключыцца ў працу рады”, — падкрэсліў міністр.
Ён таксама паведаміў, што да канца года МЗС прадставіць “урадавую праграму супрацоўніцтва з палякамі за мяжой”, а таксама абвясціў пра змены, якія тычацца “арганізацыі і фінансавання падтрымкі польскай абшчыны і заахвочвання суайчыннікаў вяртацца ў краіну, вучыцца ў Польшчы і працаваць тут”.
Акрамя гэтага, кіраўнік МЗС анансаваў змены ў закон аб “карце паляка”. Гэтыя змены, паводле яго слоў, неабходныя з меркаванняў бяспекі і для “выразнага вызначэння крытэрыяў, якія даюць права на атрыманне “карты паляка”.
“Органы, якія разглядаюць заяўкі на атрыманне “карты паляка”, сутыкаюцца з усё большымі пагрозамі, уключаючы рызыку стварэння ілжывых дасье варожа настроенымі да Польшчы службамі. Консулы і чыноўнікі павінны мець магчымасць адэкватнага рэагавання, каб “карта паляка” не стала дзіркай у міграцыйных працэдурах”, — сказаў Сікорскі.
8 лютага 2023 года Гродзенскі абласны суд прыгаварыў журналіста, актывіста Саюза палякаў Беларусі Пачобута да 8 гадоў пазбаўлення волі ва ўмовах узмоцненага рэжыму. Суддзя Дзмітрый Бубенчык прызнаў яго вінаватым паводле ч. 3 арт.130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і ч. 3 арт. 361 (заклікі да захадаў абмежавальнага характару (санкцый), накіраваных на прычыненне шкоды нацыянальнай бяспецы) Крымінальнага кодэкса. Паводле неафіцыйнай інфармацыі, журналіст адмовіўся пісаць прашэнне аб памілаванні.
Пасля гэтага Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).
Прэзідэнт Польшчы Анджэй Дуда 24 жніўня заявіў, што Варшава працягвае працу па вызваленні Пачобута.
29 жніўня Сікорскі паведаміў, што для вызвалення Пачобута Польшча “спрабуе розныя ідэі”. Чыноўнік выказаў надзею, што “адна з іх нарэшце спрацуе”.