Вайсковыя вучэнні Літвы пройдуць каля мяжы з Беларуссю

6 лістапада, Позірк. Міжнародныя камандна-штабныя вучэнні “Моцная воля 2024” пройдуць 6–20 лістапада “ў загадзя вызначаных вайсковых і грамадзянскіх раёнах Каўнаса і Паўднёва-Усходняй Літвы”, паведамляе прэс-служба Узброеных сіл краіны.

“Асноўная мэта вучэнняў, якія арганізуюцца штабам камандавання Сухапутных войскаў, — адпрацоўка падрыхтоўкі падначаленых падраздзяленняў да планавання і правядзення буйнамаштабных абарончых аперацый, узаемадзеяння з саюзнікамі ў НАТО, інтэграцыі падраздзяленняў баявога забеспячэння і каардынацыі ўзаемных дзеянняў”, — гаворыцца ў паведамленні.

Адзначаецца, у вучэннях возьмуць удзел больш за 400 вайскоўцаў з баявой тэхнікай. Яны будуць “планаваць і праводзіць абарончыя аперацыі, выкарыстоўваючы ваенную інфармацыйную сістэму баявога кіравання і кантролю”.

УС Літвы папярэдзілі, што падчас правядзення вучэнняў на паўднёвым усходзе краіны магчымае “больш інтэнсіўнае перамяшчэнне вайсковай тэхнікі і транспартных сродкаў у светлы і цёмны час сутак”.

Літва на паўднёвым усходзе мяжуе з Беларуссю.

5 лістапада начальнік галоўнага ўпраўлення — намеснік начальніка Генеральнага штаба Узброеных сіл Беларусі Уладзімір Купрыянюк, заявіў, што “калектыўны Захад” узмацняе прысутнасць на ўсходніх межах “кааліцыйных войскаў”, якія “здольныя наносіць высокадакладныя ўдары па аб’ектах на тэрыторыі Беларусі і заходніх рэгіёнаў Расіі”.

18 верасня начальнік Дэпартамента міжнароднага ваеннага супрацоўніцтва Міністэрства абароны Валерый Равенка выказаў незадаволенасць тым, што прадстаўнікоў беларускага ваеннага ведамства не запрашаюць назіраць за заходнімі вучэннямі.

“Увесну 2024 года ў Еўропе прайшла серыя шматнацыянальных вучэнняў “Абаронца”, падчас якой былі арганізаваныя назіранні за найбуйнейшымі з іх: “Драгун” на тэрыторыі Польшчы, “Вясновы шторм” у Эстоніі і “Паўночны адказ” у Нарвегіі, — сказаў Равенка. — Ні на адно з іх прадстаўнікі Беларусі запрошаныя не былі, што ў выпадку Польшчы і Эстоніі, дзе колькасць удзельнікаў вучэнняў перавышала 13 тыс. чалавек, стала грубым парушэннем палажэнняў Венскага дакумента”.

У той жа дзень камандуючы Ваенна-паветранымі сіламі і войскамі супрацьпаветранай абароны Андрэй Лук’яновіч па выніках пасяджэння Каардынацыйнага камітэта па пытаннях СПА пры Савеце міністраў абароны краін СНД заявіў аб “своечасовай падрыхтоўцы НАТО да ўзброенага канфлікту супраць “нашых дзяржаў”.

Лук’яновіч сцвярджаў, што беларускія вайскоўцы штотыдзень фіксуюць “да 40 вылетаў выведвальнай авіяцыі” краін НАТО. “За гэты няпоўны год мы зафіксавалі 1.400 вылетаў уздоўж нашых межаў, у тым ліку лёгкаматорнай авіяцыі з тэрыторыі Польшчы і краін Балтыі. Таксама зафіксавалі пяць парушэнняў дзяржграніц Саюзнай дзяржавы. Яны парушылі 15-кіламетровую зону”, — заявіў тады спікер.

18 жніўня ў інтэрв’ю СТБ Лук’яновіч таксама адзначаў, што абстаноўка ў блізкім памежжы “няпростая”, таму неабходна загадзя рыхтавацца да “адкрытага супрацьстаяння Беларусі і Расіі з блокам НАТО”.

24 лютага 2022 года Расія пачала поўнамаштабную вайсковую агрэсію супраць Украіны, якая была падтрыманая ўладамі ў Мінску. З пачатку ўварвання, а таксама ў асобныя перыяды пазней, тэрыторыя Беларусі актыўна выкарыстоўвалася расійскай арміяй для нанясення ўдараў па Украіне.

21 ліпеня 2022 года ў інтэрв’ю французскаму інфармацыйнаму агенцтву “Франс Прэс” Лукашэнка прызнаў, што з Беларусі ва Украіну была ўведзеная 20-тысячная групоўка расійскіх войскаў. Пасля паўночныя тэрыторыі былі вызваленыя.

11 красавіка 2023 года першы намеснік міністра абароны Украіны Аляксандр Паўлюк заявіў, што ў пачатку вайны 70 тыс. вайскоўцаў 35-й агульнавайсковай арміі РФ на 7 тыс. бронемашынах “з беларускай мяжы ўварваліся” на тэрыторыю Кіеўскай вобласці.

23 кастрычніка 2024 года Лукашэнка заявіў у інтэрв’ю BBC, што Беларусь не давала РФ тэрыторыю для нападу на Украіну.

“У нас [у лютым 2022 года] былі вучэнні, на якіх было задзейнічана некалькі тысяч чалавек расійскіх войскаў. Гэтыя войскі былі ў асноўным з Усходняй акругі, і [прэзідэнт РФ Уладзімір] Пуцін пачаў выводзіць гэтыя войскі з Беларусі. Яны былі на поўдні [Беларусі], і па гэтай дарозе, міма мяжы з Украінай, ён пачаў вывад войскаў”, — сказаў Лукашэнка.

“Частку войскаў у нейкі перыяд (справакавалі, я ў гэтым перакананы) ён (Пуцін. — “Позірк”.) завярнуў на Кіеў. Чаму так адбылося? Спытайце ў Зяленскага”, — дадаў Лукашэнка.

У тым ліку за саўдзел у расійскай агрэсіі заходнія краіны ўвялі санкцыі супраць прадстаўнікоў рэжыму Лукашэнкі і многіх прадпрыемстваў краіны. Блок НАТО пачаў нарошчваць сваю групоўку ў геаграфічна набліжаных да Беларусі і РФ краінах таксама пасля пачатку вайны.