За “здраду дзяржаве” асуджана не менш за 88 чалавек — “Вясна”
7 лістапада, Позірк. Пасля прэзідэнцкіх выбараў 2020 года паводле арт. 356 Крымінальнага кодэкса (здрада дзяржаве) у Беларусі асуджана не менш за 88 чалавек, у тым ліку 13 жанчын, паведамляе праваабарончы цэнтр “Вясна”.
Паводле звестак праваабаронцаў, колькасць пераследуемых паводле гэтага артыкула КК “імкліва расце”, дзевяць месяцаў таму іх было “амаль удвая менш”.
Адзначаецца, што паводле ч. 1 арт. 356 КК пакаранне складае ад 7 да 15 гадоў зняволення, паводле ч. 2 — да пажыццёвага зняволення або смяротнага пакарання.
“Вясна” звяртае ўвагу, што 10 чалавек асуджаныя за “здраду дзяржаве” завочна. Сярод іх дэмакратычны лідар Святлана Ціханоўская, яе дарадца Франак Вячорка, фігуранты справы “рэйкавых партызан”, прадстаўнікі аб’яднання былых сілавікоў ByPol Аляксандр Азараў і Станіслаў Лупаносаў, падпалкоўнік міліцыі Юрый Махнач, фігуранты справы аб “дыверсіі ў Мачулішчах” і інш.
Падкрэсліваецца, што справы аб “здрадзе дзяржаве” разглядаюцца на закрытых судовых пасяджэннях, таму “абставіны пераследу часам можна даведацца толькі з дзяржаўных і прапагандысцкіх медыя і прэс-службаў ведамстваў”.
Да рэкордных 25 гадоў зняволення за “дзяржздраду” прыгавораныя чатыры чалавекі. Дваіх — Азарава і фігуранта справы аб “дыверсіі ў Мачулішчах” Віталя Якуціка — асудзілі завочна. Прадпрымальнік і актывіст Мікалай Аўтуховіч, а таксама “рэйкавы партызан” Дзяніс Дзікун цяпер адбываюць тэрміны пакарання ва ўмовах строгага і ўзмоцненага рэжыму адпаведна.
Беларускія ўлады пасля 2020 года выкарыстоўваюць асобныя артыкулы КК для палітычнага пераследу і рэпрэсій нязгодных. Акрамя артыкула аб “здрадзе дзяржаве”, выкарыстоўваюцца і іншыя. З ліпеня па верасень было ўзбуджана не менш за 142 крымінальныя справы паводле “экстрэмісцкіх” артыкулаў КК, вынесена мінімум 119 прыгавораў.
У апошнія дні кастрычніка і пачатку лістапада прайшлі масавыя затрыманні паводле арт. 357 КК (змова ці іншыя дзеянні, учыненыя з мэтай захопу дзяржаўнай улады). Рэйды праводзілі супрацоўнікі КДБ.
