На форуме ў Галіфаксе Ціханоўская выступіць на панэлі пра пагрозы з боку недэмакратычных краін

22 лістапада, Позірк. На Міжнародным форуме па бяспецы ў Галіфаксе (22–24 лістапада, Канада) беларускі дэмакратычны лідар Святлана Ціханоўская выступіць на панэльнай дыскусіі пра глабальныя пагрозы з боку Расіі, Кітая, Ірана і Паўночнай Карэі, паведамляе прэс-служба палітыка.

У Галіфаксе Ціханоўская правядзе сустрэчы з міністрам замежных спраў Канады Мелані Жалі, ценявым міністрам нацыянальнай абароны Джэймсам Безанам, а таксама сенатарам ЗША Джын Шахін.

Палітык у рамках візіту возьме ўдзел ў сесіі Парламенцкай асамблеі НАТО ў Манрэалі, у гэтым жа горадзе яна сустрэнецца з прадстаўнікамі беларускай дыяспары.

У Таронта дэмлідар сустрэнецца з прэм’ер-міністрам правінцыі Антарыа Дагам Фордам, а таксама паразмаўляе з дыяспарай.

У Атаве запланаваны ўдзел Ціханоўскай у “Беларускім вечары”, кансультацыях беларускіх дэмакратычных сіл з урадам Канады. Палітык таксама правядзе брыфінг для дыпламатаў краін ЕС. Яна сустрэнецца з амбасадарамі Германіі ў Канадзе Ц’ёрвен Бельман і Матыясам Лютэнбергам, а таксама членамі парламенцкага камітэта па замежных справах.

Візіт Ціханоўскай у Канаду працягнецца з 22 па 26 лістапада. Ціханоўская некалькі разоў наведвала Канаду, у мінулы раз — сёлета ў сярэдзіне красавіка.