Палітвязнямі прызнаныя муж і жонка — мастакі Рымашэўскі і Шчамялёва

29 лістапада, Позірк. Яшчэ 10 зняволеных атрымалі статус палітычных рашэннем праваабарончай супольнасці ад 28 лістапада. Іх агульная колькасць дасягнула 1.296.

У адпаведны спіс уключаныя змешчаныя пад варту і асуджаныя паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) Уладзіслаў Наварыч, Артур Трушко, Вадзім Кутасевіч, Аляксандр Нікіцін, Антон Булах, Людміла Шчамялёва, Ігар Рымашэўскі, Юрый Лавецкі, паводле ч. 2 арт. 293 (масавыя беспарадкі) — Станіслаў Дубоўскі, паводле ч. 2 арт. 293 і арт. 368 (абраза Лукашэнкі) — Максім Сандракула.

Муж і жонка Шчамялёва і Рымашэўскі — беларускія мастакі, іх працы знаходзяцца ў Мастацкім музеі Webkunsthaus (Германія), прыватных калекцыях па ўсім свеце. Пра затрыманне мужа і жонкі стала вядома 27 кастрычніка. 64-гадовая Людміла Шчамялёва — дачка вядомага беларускага мастака Леаніда Шчамялёва (1923-2021).

32-гадовы Булах — былы супрацоўнік МНС, у 2020 годзе звольніўся на знак пратэсту. Пасля гэтага працаваў у сферы ІТ.

Праваабаронцы патрабуюць неадкладна вызваліць усіх палітвязняў, а таксама грамадзян, затрыманых у сувязі з рэалізацыяй свабоды мірных сходаў у поствыбарчы перыяд, і спыніць рэпрэсіі.

Адпаведную заяву падпісалі праваабарончы цэнтр “Вясна”, Беларускі Хельсінкскі камітэт, “Прававая ініцыятыва”, Беларуская асацыяцыя журналістаў, Беларускі ПЭН, Human Constanta, Офіс па правах людзей з інваліднасцю, Lawtrend.