Пенсіянерка патанула ў выніку ДТЗ у Магілёўскай вобласці (дапоўнена)

Дададзеныя 5–7-мы абзацы.

8 снежня, Позірк. Аб смяротным дарожна-транспартным здарэнні ў Касцюковіцкім раёне (Магілёўская вобласць) паведаміла ў аператыўнай сутачнай зводцы прэс-служба Міністэрства па надзвычайных сітуацыях.

Адзначаецца, што інфармацыя аб ДТЗ з удзелам легкавога аўтамабіля паступіла ў ведамства 7 снежня ў 10:20.

Паводле даных МНС, кіроўца не справіўся з кіраваннем, пасля чаго “аўтамабіль з’ехаў у штучны вадаём і перакуліўся”.

“З затопленага аўтамабіля вынятая патанулая грамадзянка 1946 года нараджэння, пенсіянерка”, — гаворыцца ў паведамленні.

Аб падобным ДТЗ са смяротным зыходам у Воранава (Гродзенская вобласць) паведамляе прэс-служба Следчага камітэта.

Паводле папярэдніх даных, 8 снежня каля 04:00 гадзін 19-гадовы кіроўца аўтамабіля “Аўдзі” не справіўся з кіраваннем. “Транспартны сродак з’ехаў на абочыну, перакуліўся, пасля чаго ўпаў у вадаём”, — адзначае СК.

“Аўтамабіль выняты з вады супрацоўнікамі МНС. Устаноўлена, што ў момант аварыі, у іншамарцы знаходзіўся толькі кіроўца. Ён загінуў”, — гаворыцца ў рэлізе.