Трамп: Надзвычай паспяховы пасланнік па Беларусі Коўл на новай пасадзе будзе працаваць над вяртаннем амерыканскіх грамадзян

5 кастрычніка, Позірк. Пра тое, што “выбітны юрыст” і “надзвычай паспяховы пасланнік па Беларусі” Джон Коўл стане новым кандыдатам на пасаду яго “спецыяльнага пасланніка <…> па справах закладнікаў у рангу амбасадара”, паведаміў 4 кастрычніка на сваёй старонцы ў сацыяльнай сетцы Truth Social прэзідэнт ЗША Дональд Трамп.

“За апошні год Джон ужо дамогся вяртання з Беларусі больш як 65 амерыканцаў і грамадзян саюзных краін, а таксама правёў перамовы, вынікам якіх стала вызваленне больш як 800 палітычных зняволеных з некалькіх краін Усходняй Еўропы, — адзначыў ён. — На новай пасадзе ён будзе нястомна працаваць над вяртаннем амерыканскіх грамадзян дадому”.

“Адам Бёлер (раней займаў пасаду спецпасланніка па справах закладнікаў. — “Позірк”.), які прарабіў неверагодную працу, дамогшыся вяртання 196 закладнікаў, працягне аказваць садзейнічанне па іншых пытаннях у якасці старшага дарадцы”, — дадаў Трамп.

Кандыдатуру Коўла яшчэ мае зацвердзіць Сенат ЗША.

Шырока паведамлялася пра пяць публічных сустрэч Коўла з Аляксандрам Лукашэнкам у Мінску, пасля якіх на волю выйшла агулам 464 чалавекі (21 чэрвеня 2025 года — 14, 11 верасня — 52, 12–13 снежня — 123, 19 сакавіка 2026 года — 250, 15–16 верасня — 25). Разам з тым са слоў самога амерыканскага дыпламата вядома, што ён сустракаўся з Лукашэнкам у беларускай сталіцы яшчэ напрыканцы красавіка. У рамках перамоўнага працэсу ЗША змякчаюць санкцыі ў дачыненні да Мінска.

Варта адзначыць, што публічныя кантакты прадстаўнікоў ЗША і беларускіх уладаў актывізаваліся яшчэ раней — пасля вяртання Трампа ў Белы дом на пачатку 2025 года. Да Коўла ў перамоўных працэсах вядучую ролю адыгрывалі Крыс Сміт, Кіт Келаг.