Беларусь займае чацвёртае месца ў свеце па колькасці журналістаў у няволі — “Рэпарцёры без межаў”

12 снежня, Позірк. Беларусь займае чацвёртае месца ў свеце па колькасці журналістаў, якія знаходзяцца ў зняволенні, гаворыцца ў штогадовым дакладзе праваабарончай арганізацыі “Рэпарцёры без межаў” (RSF).

Найбольшая колькасць арыштаваных журналістаў у Кітаі (124, у тым ліку 11 — у Ганконгу), Бірме (61), Ізраілі (41), Беларусі (40), Расіі і В’етнаме (па 38), адзначаюць аўтары.

Агулам, паводле звестак RSF, у турмах па ўсім свеце ўтрымліваецца 550 журналістаў — на 7% больш, чым летась. У 2024 годзе да пазбаўлення волі прыгаворана 72 журналісты, сумарны прызначаны тэрмін зняволення перавысіў 250 гадоў.

У дакладзе падкрэсліваецца, што гвалт над журналістамі, які “часта здзяйсняюць урады або ўзброеныя групоўкі пры поўнай беспакаранасці”, патрабуе “неадкладнага адказу”. Неабходна “тэрмінова мабілізаваць усе сілы для абароны журналістаў і журналістыкі”.

У дакладзе адзначана “трывожная інтэнсіфікацыя нападаў на журналістаў, асабліва ў зонах канфліктаў, дзе адбылася палова забойстваў журналістаў, зарэгістраваных сёлета”.

Найнебяспечнейшым рэгіёнам названы сектар Газа, дзе за пяць гадоў “загінула найбольшая колькасць журналістаў пры выкананні сваіх абавязкаў”.

На думку генеральнага дырэктара арганізацыі Ціба Брутэна, журналістаў у турмы “кінулі рэжымы”. “Гэтыя злачынствы, якія часта арганізуюцца ўрадамі або ўзброенымі групоўкамі, топчуць міжнароднае права і занадта часта застаюцца беспакаранымі… Мы павінны абараняць тых, хто нас інфармуе, а значыць, абараняць праўду”, — падкрэсліў Брутэн.

Беларусь заняла 167-е месца ў сусветным індэксе свабоды прэсы 2024 года, які “Рэпарцёры без межаў” прадставілі ў траўні. Адзначалася, што “крыжовы паход супраць незалежнай журналістыкі” працягвае Расія (162-е месца), і ў “гэтай зоне з Расіяй супернічаюць толькі дзве дзяржавы: Беларусь (167-е месца), чый рэжым пераследуе журналістаў на падставе барацьбы з “экстрэмізмам”, і Туркменістан (175-е месца), дзе прэзідэнт, які валодае неабмежаванымі паўнамоцтвамі, забараняе любую незалежную інфармацыю”.

У індэксе-2023 Беларусь займала 157-е месца, у 2022 годзе — 153-е.