У дачыненні да лесаруба распачатая крымінальная справа праз загінулага ад паваленага дрэва калегу

17 снежня, Позірк. Пра гібель мужчыны пры валцы лесу ў Лунінецкім раёне (Брэсцкая вобласць) паведамляе Следчы камітэт.

Паводле даных ведамства, 57-гадовы абрубшчык сукоў атрымаў смяротныя цялесныя пашкоджанні пры падзенні спілаванай елкі.

У дачыненні да 42-гадовага вальшчыка лесу распачатая крымінальная справа паводле ч. 1 арт. 144 КК (прычыненне смерці па неасцярожнасці). Адзначаецца, што паводле папярэдняй інфармацыі, ён “пры выкананні лесасечных працаў не пераканаўся ў адсутнасці ў небяспечнай зоне старонніх людзей”.

11 снежня ў Быхаўскім раёне (Магілёўская вобласць) падчас расчысткі ляснога ўчастка загінуў вальшчык лесу, яго прыціснула дрэвам. Аб узбуджэнні крымінальнай справы не паведамлялася.