В бальніцах застаюцца дзевяць пацярпелых ад пажару ў віцебскім ГЦ “Беларусь”

18 снежня, Позірк. У бальніцах застаюцца дзевяць пацярпелых ад пажару ў гандлёвым цэнтры “Беларусь” у Віцебску, паведамляе прэс-служба аблвыканкама.

Адна жанчына па-ранейшаму знаходзіцца ў цяжкім стане.

Паведамляецца, што “пацыентам надаюць усю неабходную медычную дапамогу лекары абласной бальніцы і бальніцы хуткай медыцынскай дапамогі”.

Старшыня аблвыканкама Аляксандр Субоцін 17 снежня паведаміў, што ў бальніцах знаходзілася 10 пацярпелых.

Увечары 13 снежня ў ГЦ адбыўся пажар, агонь ахапіў плошчу ў 2 тыс. квадратных метраў. 90 выратавальнікам спатрэбілася больш за чатыры гадзіны і 21 адзінак тэхнікі, каб справіцца са здарэннем. З будынка эвакуявалі больш за 200 чалавек.

14 снежня Следчы камітэт паведаміў аб пачатку крымінальнай справы па факце пажару ў гандлёвым цэнтры “Беларусь”. Следства вядзецца паводле ч. 2 арт. 304 КК (парушэнне патрабаванняў пажарнай бяспекі, што па неасцярожнасці пацягнула прычыненне значнай шкоды).

Мінздароўя паведамляла, што на 15 снежня налічвалася 20 пацярпелых, з іх 16 былі шпіталізаваныя ў дзень пажару, а чатыры чалавекі звярнуліся пазней па псіхалагічную дапамогу. Адна жанчына знаходзілася ў рэанімацыі ў цяжкім стане і была падключаная да апарата ШВЛ.

16 снежня стала вядома пра затрыманне падазраваных у парушэнні патрабаванняў пажарнай бяспекі ў гандлёвым цэнтры “Беларусь”. Пасля нарады па тэме пажару ў кіраўніка адміністрацыі Аляксандра Лукашэнкі Дзмітрыя Крутога міністр унутраных спраў Іван Кубракоў наведаў затрыманых у Першамайскім РАУС. У якім горадзе яны знаходзяцца і колькі іх, не паведамлялася.