У падручніку па гісторыі для 11 класа будуць “вельмі сур’ёзна” ацэнены падзеі 2020 года — Мінадукацыі

23 снежня, Позірк. У падручнік “Гісторыя Беларусі ў кантэксце сусветнай гісторыі” для 11-х класаў будзе ўключана інфармацыя пра падзеі 2020 года, заявіў 23 снежня міністр адукацыі Андрэй Іванец па выніках пасяджэння ведамаснай камісіі па навукова-метадычным забеспячэнні гістарычнай палітыкі.

Паводле слоў чыноўніка, якога цытуе прэс-служба Мінадукацыі, у падручніку будуць “вельмі сур’ёзна” ацэненыя “тыя падзеі, якія адбываліся [ў Беларусі] у 2020 годзе”.

Таксама будзе вывучацца тэма “ўз’яднання беларускага народа ў 1939 годзе”, што Іванец назваў “адной з найважнейшых гістарычных падзей станаўлення” Беларусі.

“Безумоўна, гэта будуць пытанні генацыду беларускага народа ў гады Вялікай Айчыннай вайны, партызанскі і падпольны рух. Вельмі важна данесці гістарычную праўду аб Вялікай Айчыннай вайне нашым дзецям”, — адзначыў міністр.

Кіраўнік Мінадукацыі дадаў, што ў навучальным дапаможніку будзе распавядацца пра “станаўленне суверэннай Беларусі”, будуць закранутыя “такія пытанні, як прэзідэнцкая рэспубліка, гістарычны выбар беларускага народа, каляровыя рэвалюцыі, рэферэндумы 1994-га, 1995-га і іншых гадоў”, якія “фактычна былі гістарычным выбарам” народа “ў непрацяглы 30-гадовы перыяд станаўлення сучаснай незалежнай Беларусі”.

Рэферэндумы ў Беларусі праводзіліся ў 1995 і 1996 гадах, дзякуючы ім Аляксандр Лукашэнка істотна пашырыў свае паўнамоцтвы. У 1994-м ён перамог на першых прэзідэнцкіх выбарах у незалежнай Беларусі.

У даследаванні Беларускага інстытута публічнай гісторыі “Беларускія падручнікі па гісторыі як люстэрка дзяржаўнай гістарычнай палітыкі”, прэзентаванага 12 снежня гісторыкам Аляксеем Ластоўскім, гаварылася, што з падручніка гісторыі для 11 класа прыбраны партрэт Кастуся Каліноўскага, паўстанне 1863 года “апісваецца максімальна нейтральна, без якіх-небудзь характарыстык”. Адзначана таксама “прынцыповая антыпольскасць” падручніка.

“Падзеі 2020 года апісваюцца суха, — сказаў Ластоўскі на прэзентацыі. — Шостыя прэзідэнцкія выбары прайшлі 9 жніўня 2020 года. З пяці кандыдатаў, паводле даных ЦВК, дзеючы прэзідэнт атрымаў падтрымку 80,1% выбаршчыкаў”.

Ідэалагізацыя школьнай адукацыі ў Беларусі ўзмацнілася пасля падзей 2020 года.

У верасні школьнікі пачалі навучацца па тых жа праграмах, што і летась. Аднак з’явіліся некаторыя факультатыўныя заняткі з акцэнтам на выхаванне патрыятызму, бо ў школе галоўнае “не навучанне, а выхаванне”, заявіў Іванец на пашыраным педсавеце 27 жніўня з удзелам Аляксандра Лукашэнкі.

Напрыклад, уведзены факультатыў “Асновы духоўна-маральнай культуры і патрыятызму” для 8-х (9-х) класаў у рамках пагаднення паміж дзяржавай і Беларускім экзархатам Рускай праваслаўнай царквы. Дэ-факта гэта працяг факультатыва для навучэнцаў, якія пачалі яго наведваць пасля ўкаранення ў 2021 годзе, будучы ў 5-м (6-м) класе.

У гэтым навучальным годзе ва ўсіх класах школ штомесяц праходзіць інфармацыйная гадзіна “Генацыд беларускага народа”.

Для падобных заняткаў у 2023 годзе выдадзеныя падручнікі “Генацыд беларускага народа ў гады Вялікай Айчыннай вайны”. З’явіліся адпаведныя дапаможнікі асобна для 1-4-х, 5-9-х і 10-11-х класаў.

Выкарыстоўваць інфармацыйна-аналітычныя матэрыялы крымінальнага расследавання аб “генацыдзе беларускага народа”, прадастаўленыя Генеральнай пракуратурай, у школе пачалі ў 2022 годзе.

Пры вывучэнні названай тэмы ўлады праводзяць паралель паміж гітлераўцамі і ўдзельнікамі пратэстаў супраць фальсіфікацыі вынікаў прэзідэнцкіх выбараў 2020 года на карысць Лукашэнкі.

У 21 школе апрабуюць падручнік гісторыі найноўшага часу, у якім падзеі 2020 года ацэнены як спроба дзяржаўнага перавароту.

Педагагічная супольнасць не супраціўляецца падобнай падачы матэрыяла, паколькі гэта азначала б паставіць сябе пад рызыку пераследу. Пяць службовых асоб у жніўні прыцягнута да дысцыплінарнай адказнасці ў Віцебскай вобласці за тое, што ў рэгіёне “праца па грамадзянскім і ваенна-патрыятычным выхаванні непаўналетніх арганізавана не ў дастатковай ступені”, паведамляла прэс-служба Генпракуратуры.