У Беларусі трэці дзень запар абнаўляюцца гістарычныя рэкорды цяпла
20 красавіка, Позірк. Трэці дзень запар у Беларусі абнаўляюцца гістарычныя рэкорды цяпла, сведчыць праведзены “Позіркам” параўнальны аналіз аператыўных і архіўных даных Белгідрамета.
19 красавіка ў Полацку паветра прагрэлася да 25,8 градуса вышэй за нуль. Ранейшы максімум дня трымаўся з 2000 года (25,5 градуса ў Брэсце).
Для 17 красавіка новы экстрэмум складае цяпер 27,8 градуса — зафіксаваны ў Драгічыне (было 26,2 у Жыткавічах у 1972 годзе), для 18 красавіка — 28,2 (у Брэсце; было 22,9 на метэастанцыі “Палеская“ ў Лунінецкім раёне).
Агульна мінулым днём перапісана 33 лакальных тэмпературных максімумы, у тым ліку ў Мінску і трох абласных цэнтрах, а ў Мар’інай Горцы паў рэкорд 91-гадовай даўніны.
