Асуджаны мужчына, які пратэставаў супраць пазбаўлення бацькоўскіх правоў каля Вярхоўнага суда

26 снежня, Позірк. Да паўтара года абмежавання волі без накіравання ў папраўчую ўстанову адкрытага тыпу прыгаварыў суд Цэнтральнага раёна Мінска жыхара сталіцы. Ён абвінавачваўся па арт. 342² Крымінальнага кодэкса (неаднаразовае парушэнне парадку арганізацыі або правядзення масавых мерапрыемстваў), паведамляе прэс-служба сталічнай пракуратуры. Мяркуючы па прэс-рэлізе, у гэтым выпадку гаворка не ідзе пра палітычны пераслед.

48-гадовы асуджаны 7 жніўня 2024 года каля будынка Вярхоўнага суда правёў пікетаванне ў сувязі з пазбаўленнем яго бацькоўскіх правоў у дачыненні да сына і яго наступным усынаўленнем. Мужчына “выказваў асабістыя інтарэсы і пратэст з дэманстрацыяй транспаранта“, а на правядзенне пікета “не атрымаў ва ўстаноўленым парадку дазвол Мінскага гарвыканкама“, адзначае пракуратура.

Адзначаецца, што “дадзенае дзеянне ” ён здзейсніў на працягу года пасля накладання на яго спагнанняў за невыкананне парадку арганізацыі і правядзення масавых мерапрыемстваў па арт. 24.23 КаАП.

На судзе грамадзянін віну прызнаў.

У 2023 годзе бацькоўскіх правоў было пазбаўлена 2.776 чалавек, у тым ліку 1.062 жанчыны (38,3%) і 1.714 мужчын (61,7%), сведчаць звесткі Вярхоўнага суда.

У 2022 годзе гэтую меру выкарысталі для 2.705 чалавек. Такім чынам, за год колькасць грамадзян, пазбаўленых бацькоўскіх правоў, вырасла на 2,6%.

Колькасць дзяцей, чые бацькі пазбаўленыя гэтых правоў, у 2023 годзе склала 3.427 (ва ўзросце да года ўключна — 221, ад 2 да 3 гадоў — 281, ад 4 да 6 гадоў — 610, ад 7 да 10 гадоў — 977, ад 11 да 14 гадоў — 796, ад 15 да 17 гадоў — 542).