У снежні на волю выйшла не менш за 69 палітвязняў — “Вясна”

10 студзеня, Позірк. У снежні 2024 года на волю ў Беларусі выйшла не менш за 69 палітвязняў, 20 з якіх цалкам адбылі тэрмін пакарання, 49 — былі памілаваныя, паведамляе праваабарончы цэнтр “Вясна”.

Праваабаронцы назвалі прозвішчы некаторых вызваленых палітвязняў, у тым ліку экс-дырэктара агенцтва БелаПАН Ірыны Леўшынай, Аляксандра Бірэты, Аляксандра Тарасенкі, Віктара Кулінкі, былога супрацоўніка пракуратуры Яўгена Бабака, а таксама жанчын, аб памілаванні якіх паведаміў 9 студзеня прапагандыст Юрый Васкрасенскі.

На 30 лістапада беларуская праваабарончая супольнасць прызнавала палітвязнямі 1.296 чалавек, на 31 снежня — 1.265.

У снежаньскім штомесячным аглядзе ПЦ “Вясна” паведамляў, што зафіксаваў 759 выпадкаў палітычна матываваных рэпрэсій (затрыманняў, ператрусаў і інш.), якія “вынікаюць з крымінальнага і адміністрацыйнага пераследу”, а таксама “да 150 палітычна матываваных прыгавораў”.