Ціханоўская ў Давосе возьме ўдзел у дыскусіі па бяспецы

15 студзеня, Позірк. Беларускі дэмакратычны лідар Святлана Ціханоўская запрошаная для ўдзелу ў дыскусіі “Мір праз сілу” на Сусветным эканамічным форуме ў Давосе (Швейцарыя).

Дыскусія пройдзе 21 студзеня, паведамляецца на інтэрнэт-партале форуму.

Удзельнікамі панэлі таксама стануць прэм’ер-міністр Швецыі Ульф Крыстэрсан, вярхоўны галоўнакамандуючы аб’яднаных сіл НАТО ў Еўропе генерал Крыстафер Кавалі, намеснік рэдактара і вядучы аглядальнік па міжнародных пытаннях выдання Financial Times Гідэон Рахман.

“Пасля многіх гадоў недаінвеставання вайсковыя выдаткі ў Заходняй і Цэнтральнай Еўропе цяпер вышэйшыя, чым у канцы Халоднай вайны, дасягнуўшы 350 млрд еўра ў 2024 годзе, у той час як абмеркаванні абароннай палітыкі ўсё часцей перамяшчаюцца з дбайна ахоўваемых нацыянальных сталіц у калідоры Брусэля”, — гаворыцца ў анонсе дыскусіі.

Плануецца, што ўдзельнікі абмяркуюць “сапраўдную еўрапейскую абаронную стратэгію”, якая абапіраецца на “трансатлантычны альянс, які больш не з’яўляецца нязломным”, з улікам “усё большых пагроз на кантыненце і яго блізкім замежжы”.

Сусветны эканамічны форум у Давосе пройдзе 20–24 студзеня.

Год таму дэмлідар таксама ўдзельнічала ў форуме.