У 2024 годзе рознічны тавараабарот павялічыўся на 11,8%

16 студзеня, Позірк. У 2024 годзе рознічны тавараабарот склаў 90,1 млрд рублёў, павялічыўшыся на 11,8% у супастаўных цэнах да 2023-га, сведчаць даныя Нацыянальнага статыстычнага камітэта.

Адметна, што менавіта такая дынаміка росту — 11,8% — фіксавалася са студзеня — верасня па студзень — снежань.

У студзені рознічны тавараабарот вырас на 9,9%, студзені — лютым і студзені — сакавіку — на 13%, студзені — красавіку — на 12,1%, студзені — траўні — на 12,2%, студзені — чэрвені — на 11,5%, студзені — ліпені — на 11,8%, студзені — жніўні — на 12%.

Тавараабарот у сферы грамадскага харчавання за гэты перыяд вырас у гадавым выражэнні на 10,9% — да 5,6 млрд рублёў (у студзені — лістападзе рост складаў 10,9%).

Рознічны тавараабарот арганізацый гандлю, на які прыпала 95% усяго рознічнага тавараабароту, за 11 месяцаў склаўся на ўзроўні 85,6 млрд рублёў, што, як і ў мінулым месяцы на 12,8% вышэй за аналагічны леташні паказчык.

Аптовы тавараабарот склаў 181,5 млрд рублёў — на 2,6% больш, чым год таму (+3%).

Унутраны попыт (спажыванне хатніх гаспадарак) застаецца “галоўным маторам росту эканомікі”, заявіў на брыфінгу 11 лістапада старэйшы навуковы супрацоўнік даследчага цэнтра BEROC Дзмітрый Крук.