Мінздароўя апублікавала статыстыку, якая сведчыць аб рэзкім росце колькасці аперацый па эндапратэзаванні буйных суставаў

29 студзеня, Позірк. За мінулы год у Беларусі праведзена больш за 21 тыс. аперацый па пратэзаванні тазасцегнавага і каленнага сустава, паведаміла 29 студзеня прэс-служба Міністэрства аховы здароўя.

За 11 месяцаў 2024 года ў Беларусі зроблена 11,6 тыс. аперацый па эндапратэзаванні тазасцегнавага сустава і 5,5 тыс. — каленнага, паведаміў 24 лістапада ў эфіры тэлеканала СТБ намеснік міністра аховы здароўя Аляксандр Старавойтаў.

Такім чынам, за 11 месяцаў было праведзена 17.100 аперацый, у сярэднім 1.554 за месяц.

З прыведзеных 29 студзеня даных вынікае, што за снежань было праведзена каля 3.900 аперацый па эндапратэзаванні буйных суставаў, гэта значыць у 2,5 разы больш, чым у сярэднім за месяц у 2024 годзе.

У сярэдзіне траўня Міністэрства аховы здароўя паведаміла аб планах павялічыць у 2024 годзе колькасць аперацый па эндапратэзаванні каленнага і тазасцегнавага суставаў на 30,7% у параўнанні з 2023-м. Планавалася выканаць больш за 17 тыс. аперацый па замене суставаў, з іх 6,6 тыс. — каленнага. Такім чынам, Мінздароўя сцвярджала, што план па агульнай колькасці эндапратэзаванняў выкананы датэрмінова.

Паводле інфармацыі ведамства, чаканне аперацыі па замене тазасцегнавага сустава складае больш за год (на пачатак лютага 2024 года ў чарзе было 11,7 тыс. чалавек, на пачатак чэрвеня 2023-га — 14 тыс., студзеня 2020-га — 7,1 тыс.), каленнага сустава — больш за два гады (14 тыс., 15 тыс., 9,1 тыс.).

На нарадзе 23 траўня 2023 года Аляксандр Лукашэнка запатрабаваў ад ранейшага міністра аховы здароўя Дзмітрыя Піневіча да канца года ліквідаваць чаргу на эндапратэзаванне суставаў. Вырашыць праблему чакання ў лютым 2024-га паабяцаў цяперашні міністр Аляксандр Хаджаеў.

У 2022 годзе ўлады ініцыявалі “справу артапедаў”: медыкі нібыта атрымлівалі незаконныя ўзнагароды ад прыватных кампаній, якія пастаўлялі некаторыя віды медыцынскіх вырабаў, у тым ліку суставы для імплантацыі. 35 артапедаў было затрымана.

Піневіч папрасіў у Лукашэнкі дазволу ўзяць на парукі абвінавачаных у хабарніцтве ўрачоў. Той пагадзіўся, высунуўшы ўмовы: яны павінны прызнаць віну, аддаць незаконна атрыманыя сродкі, пайсці на працу, якую прапануе міністр.

У верасні 2022 года Міністэрства аховы здароўя прыпыніла працу медцэнтра “Мерсі”, пабудаванага пры падтрымцы Сусветнага банка. Беларускі расследвальніцкі цэнтр (БРЦ) адзначаў, што некаторы час “Мерсі” быў адзінай медустановай у краіне, дзе было магчыма паставіць імпартны пратэз пры пратэзаванні тазасцегнавага сустава. Такую прэферэнцыю БРЦ звязваў са складам заснавальнікаў і іх знаёмствам з набліжанымі да Лукашэнкі бізнесменамі і яго старэйшым сынам Віктарам.