Пракуратура прымусіла OZON прыбраць з продажу прызнаную “экстрэмісцкай” кнігу расійскага гісторыка

30 студзеня, Позірк. Пракуратура Магілёўскай вобласці прымусіла электронную гандлёвую пляцоўку “ОЗОН Маркет Бел” (OZON) прыбраць з продажу кнігу “Героі” Люфтвафэ” расійскага гісторыка і журналіста Канстанціна Залескага, вынікае з паведамлення на сайце Генпракуратуры.

Адзначаецца, што “Научно-популярное издание: “Герои» Люфтваффе. Первая Персональная энциклопедия / автор Константин Залесский. — М.: Яуза-пресс, 2014 — 736 с.” было прызнанае “экстрэмісцкімі матэрыяламі” на падставе рашэння суда Ленінскага раёна Магілёва ад 3 жніўня 2022 года.

Паводле звестак пракуратуры, два экзэмпляры гэтай кнігі былі даступныя для продажу на сайце ozon.by і праз мабільны дадатак “Ozon.by: тавары з дастаўкай”.

“Пракурор Магілёўскай вобласці вынес на адрас кіраўніцтва ТАА “ОЗОН Маркет Бел” прадпісанне, у якім запатрабаваў ліквідаваць парушэнні заканадаўства і неадкладна выключыць з інтэрнэт-каталога прадукцыю, прызнаную судом экстрэмісцкімі матэрыяламі, — гаворыцца ў паведамленні. — У мэтах выканання акта нагляду ТАА “ОЗОН Маркет Бел” абмежавала рэалізацыю выдання на тэрыторыі Рэспублікі Беларусь”.

“Акрамя таго, пракуратура Магілёўскай вобласці накіравала ў Мінскае РУУС даручэнне аб правядзенні праверкі на прадмет наяўнасці ў дзеяннях ТАА “ОЗОН Маркет Бел” складу адміністрацыйнага правапарушэння”, — адзначае Генпракуратура.

У апошнія гады рэжым Аляксандра Лукашэнкі актыўна выкарыстоўвае “антыэкстрэмісцкае” заканадаўства, каб абмежаваць доступ да непажаданай яму інфармацыі, у тым ліку незалежных медыя. Чаму статус “экстрэмісцкіх матэрыялаў” надалі вышэйзгаданай кнізе, невядома.