Грамадзяне РФ змогуць прагаласаваць на выбарах у Дзярждуму на тэрыторыі Беларусі — у Мінску, абласных цэнтрах і Бабруйску

5 жніўня, Позірк. Грамадзяне Расіі, якія пастаянна пражываюць або часова знаходзяцца ў Беларусі, змогуць прыняць удзел у выбарах дэпутатаў Дзяржаўнай думы РФ дзевятага склікання на сямі выбарчых участках, паведаміла 5 жніўня амбасада РФ у Мінску.

Участкі для галасавання будуць адкрытыя ў Мінску, Брэсце, Віцебску, Гомелі, Гродне, Магілёве і Бабруйску (Магілёўская вобласць). Замежная ўстанова ў сваім тэлеграм-канале прыводзіць адрасы выбарчых участкаў.

Галасаванне адбудзецца 20 верасня 2026 года з 8:00 да 20:00 па мясцовым часе.

Паведамляецца, што правам голасу змогуць скарыстацца паўналетнія грамадзяне РФ, для ўдзелу ў галасаванні неабходна мець дзеючы дакумент, які сведчыць асобу грамадзяніна Расіі, — унутраны або замежны пашпарт.

Пасля прыходу да ўлады ў Расіі ў 1999 годзе Уладзіміра Пуціна свабоднае волевыяўленне грамадзян на выбарах у гэтай краіне было паступова згорнута. Апошнія выбарчыя кампаніі ў РФ праводзяцца пад кантролем Крамля. У ніжняй палаце парламента — Дзяржаўнай думе — дамінуе прапуцінская партыя “Адзіная Расія”. Рэальнай апазіцыі гэтым у заканадаўчым органе не прадстаўлена.