МЗС Польшчы папярэдзіў пра рызыкі наведвання Беларусі для асоб з грамадзянствамі дзвюх краін

5 жніўня, Позірк. Польскае МЗС падтрымлівае найвышэйшы — чацвёрты — узровень папярэджання для асоб, якія вандруюць у Беларусь. Пра гэта паведамляе генеральнае консульства Польшчы ў Гродне.

Ведамства “рашуча не рэкамендуе” грамадзянам Польшчы здзяйсняць паездкі ў Беларусь.

Адзначаецца, што грамадзяне Польшчы, якія валодаюць таксама беларускім грамадзянствам, разглядаюцца ў юрысдыкцыі Мінска выключна як грамадзяне Беларусі. Такім чынам, падкрэсліваецца ў паведамленні, “у крызіснай сітуацыі консул не зможа аказаць консульскую дапамогу грамадзяніну Польшчы, які мае таксама беларускае грамадзянства”.

Адзначаецца, што пры выездзе ў Польшчу беларускія памежнікі патрабуюць ад асоб з двума грамадзянствамі прад’яўлення пашпарта Беларусі. Звяртаецца ўвага, што гэтае правіла распаўсюджваецца і на непаўналетніх асоб.

Рэкамендацыя суайчыннікам пазбягаць паездак у Беларусь выдадзена МЗС Польшчы 26 лютага 2022 года — на трэці дзень пасля ўварвання расійскай арміі ва Украіну, у тым ліку з беларускай тэрыторыі. Перыядычна ведамства паўтарае гэтую рэкамендацыю, падкрэсліваючы рызыкі для сваіх грамадзян на тэрыторыі, дзе больш за 30 гадоў кіруе рэпрэсіўны рэжым Аляксандра Лукашэнкі.

З 27 ліпеня па 3 жніўня 2026 года ў бязвізавым парадку ў Беларусь уехалі 6.522 жыхары еўрапейскіх краін, у тым ліку 907 грамадзян Польшчы.